Д.Үүрийнтуяа: Монгол Улс ЕАЭЗХ-той гэрээ байгуулвал ХАА-н болон хүнсний гол нэрийн бүтээгдэхүүнүүд татваргүй орж ирж, дотоодын ААН-үүд хаалгаа барих эрсдэлтэй

Евроазийн эдийн засгийн холбоотой чөлөөт худалдааны хэлэлцээр хийх асуудлаар Монгол Улс түр гэрээг үзэглэнэ гэсэн мэдээлэл гараад буй. Өөрөөр хэлбэл гэрээний төсөл боловсруулагдаж дууссан талаар зарим эх сурвалж мэдээлж буй юм.

Тэгвэл өнөөдөр болсон Аж үйлдвэржилтийн байнгын хорооны хуралдаанаар УИХ-ын гишүүн Д.Үүрийнтуяа гэрээтэй холбоотой асуудлыг хөндлөө.

УИХ-ын гишүүн Д.Үүрийнтуяа: Евроазийн эдийн засгийн холбоотой худалдааны гэрээ байгуулах асуудал яригдаж байгаа юм билээ. Гэрээний төсөлд хөдөө аж ахуйн болон хүнсний гол нэрийн бүтээгдэхүүн багтсан байна. Тухайлбал, мах махан бүтээгдэхүүн, сүү сүүн бүтээгдэхүүн, төмс, хүнсний ногоо, улаанбуудай, архи, пиво, ундаа гэх мэт. Энэ чигээрээ гэрээ зурагдвал хөдөө аж ахуйн үйлдвэрлэл эрхэлж байгаа ААН-үүд хаалгаа барих эрсдэл үүснэ. Гэрээ зурагдсанаар импортын татваргүй бараа орж ирэх юм билээ.