ХЭҮК: Хүүхдүүд хоорондоо үерхээд сайн дурын үндсэн дээр бэлгийн харьцаанд орсон байтал хохирогч гэмт хэрэгтэн болох нь эрс нэмэгдэж байна

Хуульзүйн байнгын хорооны хуралдаанаар Монгол Улс дахь хүний эрх, эрх чөлөөний байдлын талаарх 24 дэх илтгэлийг хэлэлцэж байна. Энэ үеэр Хүний эрхийн комиссын гишүүн Ж.Хунан "Өнөөдрийн байдлаар сургалт хүмүүжлийн тусгай байгууллагад хүмүүжиж буй 39 эрэгтэй хүүхдийн 17 нь бэлгийн эрх чөлөө, халдашгүй байдлын эсрэг гэмт хэрэг үйлдсэн үндэслэлээр хүмүүжиж байгаа. 14-оос доош насны хүүхдийг хүчиндэх гэмт хэрэг нь хэлбэрийн болоод агуулгын шинж шаарддаггүйтэй холбоотой гэж үздэг. Иймд хуульч, судлаачдын зүгээс бэлгийн бойжилт эрт эхэлж байгаатай холбоотойгоор 14-оос доош насны хүүхдийг хүчиндэх гэмт хэргийн агуулгыг эргэж харахгүй бол хүүхдүүд хоорондоо үерхээд сайн дурын үндсэн дээр бэлгийн харьцаанд орсон байтал хохирогч гэмт хэрэгтэн болох нь эрс нэмэгдэж байна" гэв.