Н.Ганибал: Төрийн тэргүүн байсан хүнд хэрэг үүсгэж, айлган сүрдүүлэх нь Үндэсний аюулгүй байдалд халтай
Ардчилсан намын Ерөнхий нарийн бичгийн дарга Н.Ганибал “Өдрийн сонин”-ы өнөөдрийн дугаарт өгсөн ярилцлагадаа Ерөнхийлөгч асан Ц.Элбэгдоржийн талаар ийн ярьжээ.
Тэрбээр “Ер нь МАН-ын улстөрчдийн кампанит ажлаар бол АН лааз өшиглөхөөс цаашгүй нам мэт тархи угаалтыг сүүлийн 10 гаруй жилийн хугацаанд МАН тасралтгүй хийсэн. Дотоодод хагалган бутаргах ажлыг ч гардан зохион байгуулсан. Намын тод дүр, лидер болгоныг гучин хэдэн оны хэлмэгдүүлэлтийн үе шиг шорон руу ачсан. Олон нийтийн сүлжээгээр толгой дараалан гутаах пиар, тархи угаалтыг хийсэн. Манай намыг муухай харагдуулахын тулд Монгол Улсын Ерөнхийлөгчөөр ажиллаж байсан, Ардчилсан намыг үүсгэн байгуулалцсан хүнд хэрэг үүсгэж эх орондоо ирж чадахгүй нөхцөлийг бүрдүүллээ. Ардчилсан намыг хүчгүйдүүлэх, муухай харагдуулахын тулд Ц.Элбэгдорж гэж хувь хүний амьдралыг золиосолж болохгүй. Төрийн тэргүүн байсан хүнд хэрэг үүсгэж эх орондоо ирвэл баривчилна шүү гэж айлган сүрдүүлэх нь нэг талаас Үндэсний аюулгүй байдалд халтай.
Тиймээс энэ асуудлыг үе үеийн Ерөнхийлөгч нар явуулж байгаа үйл ажиллагаа, цаашид явуулах бодлогодоо анхаарах ёстой. Ерөнхийлөгч байсан хүнд ямар нэгэн байдлаар өс зангидах нь хоёр хүн хоорондын асуудал биш, Монголын эрх ашигт хортой. Аль нэг намыг ялуулахаас ч илүү хортой зүйл гэдгийг анхаарах ёстой. Цаашид Монгол Улсын төрийн тэргүүн болох хүмүүс өмнөх төрийн тэргүүнүүдэд хүндэтгэлтэй хандах ёстой. Ийм жудаг, этиктэй байх хэрэгтэй” гэжээ.
