С.Шижирбат: 1024 бөхийн барилдааныг 3 өдөрт шилжүүлбэл найраа тун нарийн явагдана
Өнөө жилийн баяр наадмаар 1024 бөхийг гурван өдрийн турш барилдуулахаар шийдвэрлэсэн тухай Шадар сайд Н.Номтойбаяр мэдээлсэн. Тэгвэл Спортын тайлбарлагч С.Шижирбат байр сууриа илэрхийлэхдээ “Нар гудайтал үзнэ гэж хэллэг үндэсний бөхөд байдаг юм даа. 1024 бөх 2 өдөрт барилдаад болоод байдаг юмыг 3 өдөр рүү шилжүүлэхээр найраа тун нарийн явагдана аа. Оройжингоо шөнөжингөө нутаг нутгийн фракц бөхчүүд хоорондоо ярина, уулзана.
11-нд 3,4-ийн давааг дуусгаад 12-нд тавын даваа эхлүүлнэ гэвэл найрааг утгаар нь тухтай гэгч нь хийнэ шүү дээ, зөвхөн тавын даваа биш 6, 7, 8-ын даваануудын зохиолыг ч хангалттай зурчихна. Түрүү үзүүр хүртэл зурчихаж мэднэ шүү.
Жүжиг үзээд хууртагдаад баясмаар аядаад байж байх нь дээ. Найраа хавтгайраад удсан, гар амар давдаг учраас 1024-ийг 2 өдөрт байлгах нь зөв.
Найрааг дэмжсэн ийм шийдвэр гаргаж болохгүй. Үндэсний бөхийн холбоо нь эсэргүүцэж дэмжихгүй байх ёстой шүү дээ. Найрааг багасгахын тулд дөрвийн даваа дуусаад тавын давааг шууд эхлүүл гэж олон жил ярьдаг, шууд ам авхуулдаг болсон бол залгаад цагаа хэмнээд шууд тавын давааны барилдаанаа эхлүүл л дээ.
9 хөлт цагаан туг нь наадмын хуулиараа 7 сарын 11-нд цэнгэлдэхэд орж ирнэ, 10-нд бөхийг эхлүүлбэл бөхчүүд нь 9 хөлт цагаан тугаа тойрохгүй нь, ингэж болохгүй ээ. 5 жилд 1 удаа 1024 барилдуулах шийдвэрээ үргэлжлүүлж байгаа бол наадмын хуулийн цоорхойнуудыг засах ёстой шүү, энэ асуудлаар тусад нь бичье” гэжээ.
