ШУУРХАЙ ШТАБ: БНХАУ-аас 10 сард авахаар захиалсан түлшүүд орж ирэх эсэх нь Хятадын экспортын түр зогсолтод хамаарах эсэхээс шалтгаалахаар байна
Ерөнхий сайдын захирамжаар байгуулагдсан Шуурхай штабаас шатахуунтай холбоотой дараах мэдээллийг өгчээ. Тодруулбал,
1. Нефтийн үнэ бага зэрэг буурлаа — Brent $100.28. Ойрх Дорнодын нефтийн экспорт нэмэгдэж, G7 стратегийн нөөцөөс 100 сая баррель нефть, дизель гаргахаар болсон нь нийлүүлэлтийн айдсыг зөөлрүүлж байна. WTI $89.33 орчим байна. Эх сурвалж: Reuters
2. Гэхдээ Хормузын тээвэр дахин зогсов. Амралтын өдөр Хормузаар бямба гарагт ердөө 5 түүхий эдийн хөлөг нэвтэрч, ням гарагт бүртгэгдсэн хөдөлгөөн байгаагүй. Өмнөх амралтын өдөр 31 байсан. Танкерын халдлага болон АНУ–Ираны хэлэлцээ гацсан нь гол шалтгаан болж байна. Эх сурвалж: Gulf Times
3. Оросын НПЗ-ийн асуудал бүр ноцтой харагдаж байна. Украины Батлан хамгаалах яам алсын тусгалын цохилтуудаар Оросын нефть боловсруулах хүчин чадлын 51 хувийг ажиллагаагүй болгосон гэж мэдэгдсэн ч энэ тоог бие даан баталгаажуулаагүйг AP онцолжээ. Харин ОХУ-д шатахууны хомсдол үүсэж, бензиний борлуулалтад хязгаарлалт гарсан нь бодит дарамт байгааг харуулж байна. Эх сурвалж: AP News
Монголын хувьд сайн тал нь ОХУ дизелийн экспортын хоригоо 10-р сарын эцэс хүртэл сунгасан ч Монгол Улс Засгийн газар хоорондын гэрээний дагуу үл хамаарах орнуудын нэг хэвээр байна. Эх сурвалж: Reuters
4. Хятадын шийдвэр Монголд хамгийн анхаарах шинэ эрсдэл хэвээр. Хятадын томоохон НПЗ-үүд 10-р сарын газрын тосны бүтээгдэхүүний экспортыг түр зогсоосон бөгөөд PetroChina төлөвлөсөн бензин, онгоцны түлшний зарим ачилтаа цуцалсан. Одоогоор экспорт 10-р сарын 7-ны баярын дараа сэргэх эсэх нь тодорхойгүй бөгөөд Бээжин дотоодын нөөц, үйлдвэрлэлийн түвшинг харж шийдэх төлөвтэй байна. Эх сурвалж: Reuters
Энэ нь Монголд онцгой чухал. Засгийн газрын мэдээллээр Монгол 10-р сард БНХАУ-аас 8,000 тонн Евро-5 АИ-92, 10,000 тонн Евро-5 дизель, 1,000 тонн АИ-95, 1,000 тонн онгоцны түлш авахаар захиалсан. Тиймээс эдгээр захиалга Хятадын экспортын түр зогсолтод хамаарах эсэхээс шалтгаалахаар байна.
5. Монголд өчигдөр Шатахууны шуурхай штаб шинэ арга хэмжээ авлаа. ШТС-уудын ээлж солих цагийг өглөөний 08:30–09:00-аас 11:00 цаг болгож өөрчилсөн. Зорилго нь өглөөний оргил цагаар ШТС хаагдаж дараалал үүсэх, замын түгжрэл нэмэгдэхийг бууруулах юм.
