ШУУРХАЙ: ШТС-ууд АИ-92 шатахууныг хязгаарлалттайгаар олгож, ШТС-уудад дахин урт дараалал үүслээ
ОХУ-ын Роснефть компаниас ачигдах АИ-92 шатахууны ачилтууд хязгаарлагдаж байгаатай холбогдуулан ШТС-уудад ачилтаа хязгаарлаж эхэлсэн талаар "Сод Монгол групп" ХХК-ын албан бичигт ил дурдагдсан. Улмаар ШТС-уудад бензин авах гэсэн машинуудын урт цуваа үүслээ. Хэдийгээр УУХҮЯ, АМГТГ саяхан л шатахуун нийлүүлэлт хэвэндээ орлоо хэмээн мэдэгдэж байсан ч 7 хоногийн дараа дахин ШТС-ууд АИ-92 шатахууныг хязгаарлалттайгаар олгож, иргэдийг дахин хүнд байдалд оруулаад байна.
Уг асуудлаар ПЕТРОВИС компанийн түгээгчээс тодруулахад "Манайх өмнөх хомстолоос эхлүүлээд л 60 мянган төгрөгөөс илүү өгөхгүйгээр хязгаарлаж байна. Тэр хязгаарлалт одоо ч хэвээрээ байна. Гэнэт юу болсон юм. Оройноос эхлүүлээд маш их ачаалалтай болоод хүмүүс очерлоод эхэллээ" гэлээ.
Харин "Шунхлай" ШТС-ын түгээгч "Манайх ямар нэгэн хязгаарлалт тогтоохгүйгээр хэвийн олгож байгаа. Гэхдээ яг одоо пос машин ажиллахгүй байгаа тул түр хугацаанд бензин олгохгүй байна" хэмээлээ.
Тэгвэл уг асуудалд УУХҮ-ийн сайд Г.Ёндон "Шатахууны 5 хоногийн нөөцтэй. ОХУ, БНХАУ-аас ч ирж буй. Тиймээс хомстол үүснэ гэж айх хэрэггүй" хэмээлээ.
