ЗГ: Хөгжлийн банкыг татан буулгахгүй, дампууруулахгүй

Засгийн газар өнөөдөр /2022.02.14/ ээлжит бусаар хуралдлаа. Хуралдаанаас гарсан шийдвэрийг Ерөнхий сайд Л.Оюун-Эрдэнэ танилцуулсан юм. Үүний дараагаар тэрбээр сэтгүүлчдийн сонирхсон асуултад хариуллаа.

Тэрбээр хөгжлийн банкны асуудалд "Монгол Улсын Засгийн газар Хөгжлийн банкны зээлийг хоёр хувааж үзнэ. Мөн шинэ сэргэлтийн бодлогын хүрээнд Хөгжлийн банкыг татан буулгахгүй, дампууруулахгүй. Засгийн газар хариуцлагагүй зээлдэгчдийн өмнөөс зээлийг төлөхгүй. Цаашид Хөгжлийн банк экспорт, импортыг дэмждэг банк байж олон улсын жишгийн дагуу ажиллах хэрэгтэй.

Хөгжлийн банкыг цаашид илүү том түвшинд зээл гаргадаг, шинэ сэргэлтийн бодлогын хүрээнд мега төслүүдийг санхүүжүүлдэг, арилжааны банк санхүүжүүлж болох төслүүд рүү ордоггүй, УИХ-аар хөгжлийн төсөл гэж үзсэн төслүүдийг санхүүжүүлдэг банк болгож байж Монгол Улс эдийн засгийн хувьд илүү бэхжинэ" гэлээ.