П.Мөнхтулга: Кино үзэх 18 тэрбумыг ард түмэн дэмжихгүй байна. Дарханы арьс, ширний үйлдвэрт энэ төсвөө тавиач ээ
УИХ-ын Төсвийн байнгын хороогоор 2025 оны төсвийн төслийн гурав дахь хэлэлцүүлгийг хийж байна. Хэлэлцэж буй асуудалтай холбогдуулан УИХ-ын гишүүн П.Мөнхтулга "Кино үзэх 18 тэрбумыг ард түмэн дэмжихгүй байна. Бид арьс, ширийг жалганд хаядаг хэвээрээ л байна. Дарханы арьс, ширний үйлдвэрт энэ төсвөө тавиач ээ" гэх саналыг дэвшүүлж, асуулт асуулаа.
Харин Сангийн сайд Б.Жавхлан "Төсвийн гурав дахь хэлэлцүүлэг явж байгаа учраас би тэрийг хэлж мэдэхгүй. УИХ-аас хариулчих" гэв.
УИХ-ын Ерөнхий нарийн бичгийн дарга Б.Баасандорж "Дэгээрээ энэ саналыг өөрчлөх боломжгүй. Одоо зөвхөн найруулгын шинж чанартай хэлэлцүүлэг л явагдана" гэж тайлбарлалаа. Мөн Төсвийн байнгын хорооны дарга Ц.Даваасүрэн "Байнгын хорооноос хасъя гээд байхад гишүүд анхааралгүй хандсан. Энэ бараг өнгөрсөн байх" гэлээ.
