Г.Лувсанжамц: Шуурга намжина. Үүр цайна. Бид эвтэй байхдаа хүчтэй

Бүсчилж томсгосон тойрог, намын жагсаалт хослуулсан холимог тогтолцоогоор, анх удаа 126 гишүүнтэй бүрдсэн УИХ-ын гишүүд 2024 оны долоодугаар сарын 2-ны өдөр тангараг өргөж, гишүүд ажлаа эхлүүлсэн. УИХ-ын намрын чуулган хаалтаа хийгээд 13 хонож байна. Тэгвэл УИХ-ын гишүүн Г.Лувсанжамц төрийн ордонд ажиллахад төрсөн сүүлийн зургаан сарын мэдрэмжээ ийн бичжээ. Тэрбээр:

-Төр түмнээ түших хувьтай төржээ.Энэ эрхэм үүргийг хүлээгээд хагас жил болсон ч, харвасан сум шиг л өнгөрсөн мэт санагдаж байна. Нандин бөгөөд хариуцлагатай энэ ажлыг авахдаа, догдолж, сандарч, алганы хөлс асгаран байж, төрийн сүлд, төрийн далбаандаа мөргөн тангараг өргөсөн өдөр өчигдөрхөн мэт санагдаж байна.

Олон жил нутаг ус, аав ээж, элгэн саднаасаа хол, харийн нутагт эрдэм сурч, ажиллаж, төр түмнийхээ төлөө зүтгэх өдөр ирнэ гэж итгэж, хичээж, зүтгэж, мөрөөдөж байсан зүйл маань биеллээ олж, хариуцлагатай энэ албыг хашиж байгаадаа туйлын баяртай байна. Намайг ойлгож, дэмжиж, бүдэрсэн үед минь босгож, үргэлж дэргэд минь түшдэг хайрт эхнэр, аав ээж, ах дүү нартаа, Үгээр хурцалж, урмаар тэтгэдэг найз нөхөд, хамт олондоо,

Итгэл хүлээлгэн төр түмнээ түших боломж олгосон та бүхэнд гүнээ талархаж, итгэлийг тань зүтгэлээр, сэтгэлийг тань үйлээрээ хариулахыг цаг ямагт санаж, гэрэлт ирээдүйг бүтээх ажилд шамдан ажиллахаа дахин амлаж байна.

Төрийн үйл хэргийг хөндлөнгөөс ажиж ирсэн өнгөрсөн жилүүдийн мэдрэмж, төрийн ордонд ажиллахад төрсөн сүүлийн зургаан сарын мэдрэмжийн ялгааг уншигч тантай хуваалцаж, өөртөө үлдээх зорилгоор энэхүү тэмдэглэлээ сийрүүлж байна.

-Өнгөрсөн жилүүдийн өчил-

Үнэнийг хэлэхэд үеийн залуусын адилаар хичээх тусам бидний амьдрал дордож, зүтгэх тусам боломж холдож байгаа мэт санагдаж, төрийн түшээд, тэднийг тойрон хүрээлэгсдэд гомдох, хорсох, тэдний үйл хэргийг шүүмжлэх тохиолдол олон байжээ. Зорилготой зорилгогүйгээр бичиж сэвсэн үй түмэн үнэн худал нь мэдэгдэхгүй мэдээлэлд живж, сэтгэлийн гэрэл бөхөх үе ч чамгүй олон байсан. Тэмдэглэлийг минь уншин суугаа таны л адил цалингаас цалингийн хооронд урсан өнгөрөх өдрүүд, хайртай хүн, дотнын андаа алдах мэдрэмжид тэсэлгүй бухимдаж, уур уцаарыг аяга тагш юмаар, хагацал харууслыг бүлээн нулимсаар дэвтээдэг байжээ. Гэсэн ч сайн сайхныг мөрөөдөж тэмүүлэх зүрх, гэрэлт ирээдүйг хүсэх итгэл сэтгэлийн хүчээр хэцүүхэн өдөр, ганцаардсан шөнүүдийг давж, хөл дээрээ дахин зогсдог байсан болов уу.

-Сүүлийн зургаан сар -

Адил тангараг өргөн мөр зэрэгцэж суугаа ажлын хамт олонтойгоо өнгөрүүлсэн сүүлийн сарууд харанхуй шуурган дунд бүдчиж, заримдаа олуулаа, заримдаа цөөхүүлээ, хааяа ганцаараа алхаж байгаа мэт санагдах өдрүүд цөөнгүй байжээ. Урагшаа хараад зоригтойгоор бусдыгаа дагуулдаг нэгэн байхад, хоцорсон нэгнээ түшиж тулдаг нь байна. Туршлагаа хуваалцаж бусдадаа зааж зөвлөх нь байхад, мэдлэгээ түгээж чиглүүлэх нэгэн бас байна.

Ирээдүйг харж шинэлэг шийдлийг хэлдэг нэгэн байхад, өнгөрсөн алдааг дүгнэж, засаж залруулахыг хичээдэг нь бас байна. Зорилго нэг ч, хүрэх арга дээрээ санал зөрөлдөх хүмүүс ч бас байна. Шуурган дунд хазгай гишгэж, алдаа оноо гаргах тохиолдолд байдаг ч, чин сэтгэлээр зүтгэж байгаа хүн бүхэн, алдааг залруулж, их үйлийг бүтээхээр нэгэн зүг харж байхад алзахгүй гэх найдвар төрж байна.

Хамгийн гол нь төр түмнийхээ төлөө зүтгэсэн, зүтгэж байгаа хэн бүхэн түмэн олныхоо сайн сайхны төлөө энэ шуургыг давахаар мэрийж байгаа нь, биднийг чиглүүлэх бяцхан гэрлийн зүг хамтдаа гар гараасаа атгаад, илүү сайхан нийгмийг бүтээхээр зорьж яваа нь итгэл төрүүлж байна. Төрийн үйлийг ажил болгодог албан хаагчид, шинэ залуу үе маань ур чадвартай, хариуцлагатай, нийгмийн мэдрэмжтэй байгаа нь бидний ирээдүйг гэрэлтүүлж байна. Итгэл сэтгэлийн гэрлийг бөхөөлгүй өрдөж өгдөг та бүхэндээ баярлалаа.

Тэмдэглэлийг минь уншин суугаа эрхэм танд эрүүл энхийг хүсэж, бодол сэтгэлээ цэгнэж, зарчимдаа үнэнч, зорилгодоо тууштай байхаа дахин амлаад энэхүү тэмдэглэлээ өндөрлөе.

Шуурга намжина. Үүр цайна. Монгол түмний минь заяа их. Бид эвтэй байхдаа хүчтэй.