Баавгай гэр рүү дайрахад эмэгтэй нь амжиж зугтан дуудлага өгчээ

Баянзүрх дүүргийн Улиастайн Бурхантын ам орчимд баавгай айлын гэрт нэвтэрч, нэг хүн амиа алдсан харамсалтай хэрэг гараад байна.

Эх сурвалжийн мэдээлснээр уг хэрэг шөнийн 01:00 цагийн орчимд болсон бөгөөд голын эргээс 50-100 метрийн зайд байрлах, хашаагүй айлын гэрт баавгай нэвтэрчээ. Тухайн айлд эрэгтэй, эмэгтэй хоёр байсан бөгөөд баавгай гэрт нэвтрэх үед эмэгтэй нь нүүрээ самардуулсан ч амжиж зугтаж чаджээ. Улмаар цагдаагийн байгууллагад дуудлагад шуурхай дуудлага өгсөн байна. Харин эрэгтэйг нь баавгай зууж, гэрээс нь ойролцоогоор 100 метрийн зайд авч явжээ. Тэд мал маллан амьдардаг байсан аж.

Одоогоор Нийслэлийн Онцгой байдлын газар болон Нийслэлийн Байгаль орчны газар хамтран баавгайг эрэн хайх ажиллагааг эхлүүлэн ажиллаж байгаа аж.

Эмэгтэйгийнх нь биеийн байдал хэр байгаа талаар ГССҮТ-өөс тодруулахад "Гэмтэл согог судлалын үндэсний төвийн Салбар эмнэлгийн Яаралтай тусламжийн тасагт 2026.10.07-ны шөнийн 01:00 цагийн үед "Баавгайд бариулсан" гэх оноштой хүргэгдэж ирсэн өвчтөний биеийн байдал одоогоор хүнд байна. Гэмтлийн хувьд, толгойн хэсэгт том хэмжээний хуулагдсан шархтай, цөмрөлт цууралттай, цээж хэвлийн хэсэгт дарагдаж шахагдсан зовиуртай ирсэн.

Эмнэлгийн зүгээс мэс заслын болон шаардлагатай тусламж үйлчилгээг шуурхай үзүүлэн, биеийн байдлыг тогтворжуулах арга хэмжээг авсан.

Иргэд, олон нийтэд хандаж хэлэхэд, хотын бүсэд зэрлэг ан амьтан, баавгай орж ирсэнтэй холбоотойгоор гэр, хашаа болон амьдарч буй орчин тойрны аюулгүй байдалд анхаарах, холбогдох байгууллагуудын зүгээс зэрлэг баавгайн халдлагад өртөхөөс урьдчилан сэргийлэх, иргэдийн амь нас, эрүүл мэндийн хамгаалахад чиглэсэн үйл ажиллагааг эрчимжүүлэх шаардлагатайг зөвлөж байна" гэлээ.