Монгол Улсын уур амьсгалын өөрчлөлтийн эсрэг хийж буй ажлуудыг олон улсын шинжээчид ХЯНАЖ байна

Монгол Улсын уур амьсгалын өөрчлөлтийн эсрэг хүлээсэн үүрэг, амлалтын хэрэгжилт, ахиц дэвшлийг үнэлэх олон улсын техникийн шинжээчдийн баг энэ сарын 5-10-ны өдрүүдэд манай улсад ажиллаж байна.

Монгол Улс НҮБ-ын Уур амьсгалын өөрчлөлтийн суурь конвенц болон Парисын хэлэлцээрийн хүрээнд хүлэмжийн хийн ялгарал, шингээлт, уур амьсгалын бодлого, Үндэсний хэмжээнд тодорхойлсон хувь нэмэр (NDC)-ийн хэрэгжилтээ тогтмол тайлагнах үүрэгтэй.

Энэ хүрээнд боловсруулсан “Хоёр жил тутмын ил тод байдлын анхдугаар тайлан” (BTR1)-д олон улсын шинжээчид хяналт, үнэлгээ хийж байна. Тэд хүлэмжийн хийн үндэсний тооллогын мэдээлэл, тооцооллын үнэн зөв байдал, уур амьсгалын өөрчлөлтөд дасан зохицох бодлого болон NDC-ийн хэрэгжилтийн ахицыг нягтална.

Үнэлгээний үр дүнд Монгол Улсын тайлагналын тогтолцоог сайжруулах, цаашид хэрэгжүүлэх арга хэмжээ, чадавхыг бэхжүүлэх чиглэлээр зөвлөмж гаргах юм.