10 настай охины аминд хүрсэн хөршийнх гэх М.Даделханы эхнэрийг цагдан хорьжээ

Ховд аймгийн Буянт суманд тарвас хураахаар явсан 10 настай А охин сураггүй болоод 14 хоносон ч харамсалтай нь охины хөрш айлын гэх эрэгтэй охины амийг хохироосон болохоо хүлээн зөвшөөрч, цогцсыг нуусан газраа цагдаагийн алба хаагчдад зааж өгсөн байдаг. Хэргийн мөрдөн шалгах ажиллагаа үргэлжилж буй талаар цагдаагийн байгууллагаас мэдээлсэн.

Тодруулбал, сэжигтнүүд цагдаад өгсөн мэдүүлэгтээ “Охин бидэнтэй ногооны талбай руу явсан. Трактораас холбоотой газар хагалдаг гурвалжин төмөр дээр тоглож байгаад унасныг нь мэдэлгүй трактораар дайрсан. Тэр үед сандарсандаа охиныг шатааж, ногооны талбайдаа булсан” гэж мэдүүлээд, цогцсыг нуусан газраа цагдаад зааж өгсөн байдаг.

Тэгвэл эх сурвалжийн мэдээлж буйгаар, хөрш айлын гэх М.Даделханы эхнэрийг цагдан хорьсон байна. Өөрөөр хэлбэл, аав, ээж, хүү гурвыг цагдан хориод байгаа юм. Улмаар хэргийг Улаанбаатар хотод шалгуулахаар шилжүүлсэн аж.