Д.Наранбаатар: ЭМЯ-ны сайдыг огцруулах шалтгаанууд

Оном сангийн ТУЗ-ын дарга, доктор Д.Наранбаатар ЭМЯ-ны сайд Т.Мөнхсайханыг огцруулах үндэслэлүүдийг хэллээ.  Тэрбээр, “Миний бие хувь эрдэмтний хувьд ЭМЯ-ны сайд Тогтмолын Мөнхсайханы алдаатай шийдвэрүүд нь улс орныг маань сүйрэл рүү хөтөлж байгаа учраас түүнийг огцруулах үндэслэлүүдийг хэлье” гэсэн юм.  

БНСУ-аас коронавирусний 400 мянган ширхэг түргэвчилсэн оношлуур авч хэрэглэсэн. Хуурамч эерэг гарах магадлал 80-90 хувьтай. Ийм тестийг авах шаардлага байгаагүй.

Өвчтэй хүнийг өвчингүй гэж гаргах магадлал түргэвчилсэн оношлуурт 50-60 хувьтай. БЗД-ийн нэгдсэн эмнэлэгт гарсан тархалт бол түргэвчилсэн оношлуурын алдаа байсан.

Түргэвчилсэн оношлуурыг хэрэглэх нь буруу гэсэн мэргэжлийн хүмүүсийн шийдвэрийг Т.Мөнхсайхан сайд огт дагаагүй, зөрүүдэлсээр асуудал үүсгэж байна. Мөнгө төгрөг завших гэсэн асуудал байгаа.

Т.Мөнхсайхан сайд Дархан хотын иргэдэд PCR-ийн шинжилгээ хийхийг эрс эсэргүүцэж, хоног хугацаа алдсан. Бид хүчээр шахуу PCR шинжилгээг багцалж хийгээд 20 гаруй хүнд вирус илрүүлэн халдварын голомтыг барьж авсан.

Т.Мөнхсайхан сайд бол хүний үг сонсдоггүй, мэдлэггүй, чадваргүй, юм ойлгодоггүй, лабораторийн салбарын талаар мэдлэггүй, байгалийн тэнэгдүү хүн байна гэдэг дүгнэлтэд хүрээд байна.

Зохион байгуулалттайгаар хэвлэлийн тролл багаар намайг муулж, муутган, ЭМЯ-аас зохион байгуулалттайгаар худал мэдээлэл тараасан.

Цар тахалтай тэмцэж байх ёстой хүн хэвлэл мэдээллээр өөрийгөө магтуулахад хамгийн их анхаарч байна.

Арванхоёрдугаар сарын 9-ний өдрийн УОК, ЗГ  “үхээнц шийдвэр” гаргасан. Уг шийдвэрт Т.Мөнхсайхан сайд хамгийн их нөлөөтэй.

Энэ байдлаараа яваад байвал Монгол Улс нэгдүгээр сарын дунд үед гамшгийн байдалд орно.

“Нэг өрх-Нэг шинжилгээ”-г далайцтай, хурдан зохион байгуулаад халдварын голомтоо барьж аваад тусгаарлалтад оруулахад 10-14 хоногийн дараа хүмүүст халдвар халдаах боломжгүй болно.

Т.Мөнхсайхан арванхоёрдугаар сарын 9-нд халдварын голомтыг барьж авсан гэж ерөнхий сайдаар худал хэлүүлсэн. Засгийн Газрынхаа эсрэг ажилласан. Амгалан гаалийн ажилтнаас халдвар илрэхэд халдварын голомтыг барьж аваагүй гэдэг маш тодорхой болсон.

Т.Мөнхсайхан сайд юу ч мэдэхгүй байгаа. ХӨСҮТ, Цэргийн төв эмнэлэг, Баянзүрх нэгдсэн эмнэлэг, Сэлэнгэ аймгийн нэгдсэн эмнэлэгүүд халдварын голомт болж байна. Үүнээс болоод иргэд ковидоос өөр шалгаанаар үхэж үрэгдэнэ.

Чадал муутай Монголыг минь бүү хэл чадалтай дэлхийн том улс орнуудыг хөл дээр нь сөгдүүлж байгаа цар тахалтай бид “галаар тоглож байгаа юм шиг” тэмцэж болохгүй.

Дотооддоо халдвар алдахгүй байх боломжтой байсан. Эрүүл мэндийн салбарын ажилчдыг нохойд барьдаг мод шиг ажиллуулсаар байгаад хүмүүс нь шургаж унаж байна.

ЭМЯ 18 тэрбум төгрөгийн өртөгтэй, дэлхийн дунджаас 6 дахин үнэтэй “Цахим эрүүл мэндийн мэдээлээл технологийн плампорм”-ыг БНСУ-аас худалдаж авсан.