Олимпийн нээлт Хятадын өндөр технологийн гайхамшгийг мэдрүүлнэ
Хүн төрөлхтний эв нэгдлийн бэлэгдэл, спортын их баяр цэнгэл өвлийн олимпын наадам эхлэхэд хэдхэн цаг үлдлээ. Өнөөдөр Улаанбаатар, Бээжингийн цагаар 19:30-д өвлийн олимпийн 24 дүгээр наадам эхэлнэ. Олимпын наадамтай холбоотой зарим баримтыг сонирхуулж байна.
БНХАУ-ын нийслэл Бээжин хот өвөл ба зуны олимпийг зохион байгуулсан анхны хот болж байна.
Олимпын наадмын нээлтийг Хятадын алдарт кино найруулагч Жан И Мун найруулж байна. Тэрээр өмнө нь 2008 оны зуны олимпыг найруулсан билээ.
Бээжин 2008 зуны олимпын нээлтэнд 15 мянган хүн оролцож байсан бол энэ удаад арай цөөн буюу 3000 хүн оролцоно. Гэвч технологийн дэвшил, уран сайхантай хосолсон давтагдашгүй нээлт болно гэсэн хүлээлт бий.
Энэ удаагийн олимпийн нээлтэнд АНУ, Англи, Канад, Австри зэрэг улсын төр засгийн албан тушаалтнууд оролцохгүй. Тэд БНХАУ-ын Шинжаан уйгур дахь хүний эрхийн зөрчлийг эсэргүүцэж ийнхүү бойкот хийж байгаа юм. Гэвч ихэнх орны төр засгийн албан тушаалтнууд спортыг улс төржүүлэхийн эсрэг байгаа билээ. Монгол Улс ч олимпыг улс төржүүлэхийн эсрэг байр суурьтай байж Ерөнхий сайд Л.Оюун-Эрдэнэ тус улсад зочилж байна.
Энэ удаагийн олимп анх удаа 100 хувь хиймэл цас ашиглаж байна. Нийт 100 сая метр куб цас гаргахын тулд 220 сая литр ус ашигласан бөгөөд хиймэл цас гаргах бүх эрчим хүчийг ногоон технологиор шийдсэн байна.
Нийт 2892 тамирчин биаталон, бобслей, кёрлинг, мөсөн хоккей, лүж буюу тобагган чарга, тэшүүр, цанаар гулгах гэсэн спортын долоон төрлийн 109 тэмцээн уралдаанд өрсөлдөнө.
Олимпийн наадмын уриа: Хамтдаа хамтын ирээдүйд
Олимпийн наадам нь Хятадын инноваци технологийн гайхамшгийг харуулах бөгөөд олимпын бүх цэнгэлдэх, хотхоныг 100 хувь сэргээгдэх эрчим хүчээр хангаж байна.
Нийт тамирчдын 45.2 хувь нь эмэгтэй тамирчин байгаа жендерийн хувьд түүхэн шинэ рекорд юм.
Цар тахлын хатуу хяналт, дэглэм ч энэ олимпын нэг онцлог болж байна.
Бээжин, Янчин, Жанжиаку гэсэн 3 хотын 26 цэнгэлдэх хүрээлэн, задгай талбайд нийт 109 тэмцээн уралдаан болно.
