АТГ: Д.Эрдэнэбилэг гэмт хэрэг үйлдэж болзошгүй баримт илэрсэн учир цагдан хорих санал гаргасан
Энэ сарын 19-ний өдөр буюу өчигдөр АТГ-аас Худалдаа хөгжлийн банкны ТУЗ-ийн дарга Д.Эрдэнэбилэгээс байцаалт авсан талаар мэдээлсэн. Тодруулбал, түүнийг Хөгжлийн банкны хэрэгт холбогдуулан тайлбар, мэдүүлэг авсан байдаг.
Тэгвэл өнөөдөр АТГ-аас Д.Эрдэнэбилэгийг цагдан хорих хүсэлтээ Сүхбаатар дүүргийн шүүхэд хүргүүлсэн юм. Энэ талаар АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэнгээс тодрууллаа.
-АТГ-аас Хөгжлийн банкны ТУЗ-ийн дарга Д.Эрдэнэбилэгийг цагдан хорих хүсэлтээ хүргүүлжээ. Энэ талаар мэдээлэл өгөхгүй юу?
-ХХБ-ны ТУЗ-ийн дарга Д.Эрдэнэбилэгт холбогдох хэргийг АТГ-аас шалгаж байгаа. Түүнд холбогдох хэрэгт эрүүгийн хэрэг үүсгэж, яллагдагчаар татсан. Мөрдөн шалгах ажиллагааны явцад Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.3-т заасан гэмт хэрэгт үйлдэж болзошгүй талаар үндэслэл бүхий баримт илэрсэн учир түүнийг цагдан хорих саналаа мөрдөн байгууллагаас прокурорын байгууллагад хүргүүлсэн.
-Өчигдөр Д.Эрдэнэбилэгээс тайлбар авах үеэрээ ХХБ-ны төв оффист нэгжлэг хийсэн гэж байгаа. Илэрсэн ямар нэг зөрчил бий юу?
-Прокурорын зөвшөөрлийг үндэслэн мөрдөгчид тодорхой обьектуудад нэгжлэг хийх, мөрдөн шалгах ажиллагааг хийсэн. Яг хаана хийгдсэн эсэхээр нь мэдээлэл өгөх боломжгүй. Мөрдөн байцаалтын ажиллагаа үргэлжилж байгаа.
