Говь-Алтай аймгийн Чандмань, Өмнөговийн Гурвантэс, Ноён, Сэврэй зэрэг сумдын нутгаар ХАРЫН ЗУД нүүрлэж өвөлжилт хүндэрч байна

Шадар сайд С.Амарсайхан цаг үеийн нөхцөл байдалтай холбогдуулан мэдээлэл хийлээ. Монгол орны нийт нутгаар 2023 оны 11-12 дугаар сард 4 удаагийн цаг агаарын аюулт болон гамшигт үзэгдэл болж, нийт нутгийн 80 гаруй хувьд цасан бүрхүүл тогтсоны улмаас мал бэлчих боломжгүйд хүрсэн. Өнөөдрийн байдлаар 7 аймгийн 27 суманд төмөр буюу шилэн зудын нөхцөл үүссэн байгаа бол цасны зузаан харьцангуй бага боловч зундаа гантай байсан Говь-Алтай аймгийн Чандмань, Өмнөговийн Гурвантэс, Ноён, Сэврэй зэрэг сумдын нутгаар харын зуд нүүрлэж өвөлжилт хүндэрч байна. Зөвхөн энэ оны 1 дүгээр сарын 1-ээс 19-ны хооронд гэхэд 176 мянга гаруй мал хорогдоод байгаа юм.