Г.Занданшатар: Энгийн иргэн хашааны газраа авч чадахгүй байхад нийслэлд 49 болон 72 газар өмчилсөн гэх мэдээлэл ирсэн
Газрын тухай болон Ашигт малтмалын тухай хууль тогтоомжийн хэрэгжилт болон бусад асуудлаар хяналт шалгалт хийж санал, дүгнэлт гаргах, хянан шалгах түр хороо байгуулах бэлтгэл хангах үүрэг бүхий Ажлын хэсгийг байгуулсан.
Ажлын хэсгийг Эдийн засгийн байнгын хорооны дарга Ц.Цэрэнпунцаг ахалж байна. Мөн Ажлын хэсэгт мэргэжил арга зүйн туслалцаа үзүүлэх дэд ажлын хэсгийг 19 байгууллагын 28 албан тушаалтны бүрэлдэхүүнтэй байгуулж, анхны хуралдааныг хийлээ.
УИХ-ын дарга Г.Занданшатар хэлэхдээ "Энгийн иргэн хашааны газраа авч чадахгүй байхад нийслэлд 49 болон 72 газар өмчилсөн гэх мэдээлэл ирсэн. Сүүлийн 30 жилийн замбараагүй газар олголт нь авлига, хээл хахуультай холбогдож, нийгэмд бухимдал үүсгэж байна. Тавдугаар сарын 15-ны дотор нээлттэй сонсгол зохион байгуулж, ажлаа тайлагна" гэв.
