М.Тэлмэн олон улсын софт дартсын тэмцээнээс 2 алтан медаль хүртлээ
Японы DartsLive брэндийн жил бүр зохион байгуулдаг Софт дартсын хамгийн том олон улсын тэмцээн болох “Nippon Darts Festival” 2024 оны наймдугаар сарын 17-18-ны өдрүүдэд Япон Улсын Токио хотод амжилттай зохион байгуулагдлаа.
Энэхүү дартсын фестивальд 8000 гаруй тамирчин оролцсон бөгөөд оролцогчид болон үзэгчид сонин содон, этгээд хувцас, нүүр будалттайгаар тэмцээндээ оролцдогоороо онцлогтой аж.
Тэгвэл тус тэмцээнд манай улсын өсвөрийн шилдэг тамирчдын нэг 15 настай М.Тэлмэн өөрийн дасгалжуулагч, менежер Б.Биндэръяагийн хамт Монгол Улсаас анх удаа оролцлоо. Тодруулбал,
Наймдугаар сарын 17-ны өдөр зохион байгуулагдсан Нээлттэй хосын тэмцээнд нийт 128 хос өрсөлдсөнөөс аваргын алтан медэлийн эзэн болжээ. Мөн наймдугаар сарын 18-ны өдөр зохион байгуулагдсан үндсэн гол тэмцээний нэг 22 нас хүртэлх залуучуудын тэмцээнд түрүүлсэн байна. Уг төрөлд нийт 200-аад шилдэг залуу өрсөлдсөн ба хамгийн залуу тамирчдын нэг М.Тэлмэн түрүүлж, шуугиан тарив.
