ГХЯ: Малайзад амь насаа алдсан Б.Оргил-Эрдэнийн үхлийн шалтгаан тодорхой болоогүй. Задлан шинжилгээний хариу гараагүй
Монголын хип хоп урлагийн гол төлөөлөл болсон "Ice Top" хамтлагийн ахлагч Б.Оргил-Эрдэнэ буюу Eyescool таалал төгссөн талаарх харамсалтай мэдээг дүү Б.Очир-Эрдэнэ нь олон нийтэд өгсөн билээ. Малайз Улсад түүний амь насаа алдсан шалтгаан одоогоор тодорхой болоогүй, задлан шинжилгээний хариу гараагүй болохыг Гадаад харилцааны яам мэдээллээ. Энэ талаар "Сүүлийн өдрүүдэд олон нийтийн хэвлэл мэдээллийн хэрэгсэл болон нийгмийн сүлжээнд тус хэрэг, талийгаачийн амь насаа алдсан шалтгааны талаар үндэслэлгүй, худал ташаа мэдээлэл гарах боллоо. Монгол Улсын иргэн хилийн чанадад амь насаа алдсан харамсалтай хэргийн талаар худал ташаа мэдээлэл түгээх нь нийгэмд үл ойлголцол, ташаа ойлголт төрүүлж, талийгаачийн ар гэр, ойр тойрныхонд хүндээр тусахаас гадна холбогдох хууль тогтоомжийг зөрчиж болзошгүй анхаарна уу." гэлээ.
