Монгол гэрээс хуучин цагийн мөнгөн тоногтой хормойн боолт, 50 мянган төгрөг хулгайлсан хэрэг бүртгэгджээ
Баяр наадмын амралт, аялал зугаалгын цаг эхэлж байгаа энэ үед иргэд, амралт зугаалгаар явахдаа орон байраа удаан хугацаагаар хараа хяналтгүй орхисноос эд хөрөнгөө хулгайд алдаж энэ төрлийн гэмт хэргийн хохирогч болох тохиолдол цөөнгүй бүртгэгддэг.
Энэ оны 07 дугаар сарын 12-ны өдөр Хан-Уул дүүрэгт “Хулгайч орсон байна” гэсэн мэдээлэл цагдаагийн байгууллагад бүртгэгдсэн. Дээрх дуудлага, мэдээллийн дагуу цагдаагийн байгууллагаас шалгалтын ажиллагаа явуулахад иргэн “М” нь Монгол гэрт хууль бусаар нэвтрэн орж, хуучин цагийн мөнгөн тоногтой хормойн боолт, 50.000 төгрөг хулгайлсныг илрүүлж мөрдөн шалгах ажиллагаа явуулж байна.
Иймд иргэд Та бүхэн орон байраа эзэнгүй удаан хугацаагаар орхиж явахдаа хаалга, цоожиндоо найдвартай цоож, бэхэлгээ хийж, хөршийн холбоогоо сайжруулж хулгайн гэмт хэргээс өөрсдийн эд хөрөнгөө хамгаалж, болзошгүй эрсдэлээс урьдчилан сэргийлнэ үү.
