Хохирогчийн аав Д.Дашзэвэг: Хар тамхи хэрэглэсэн баян айлын хүүхдүүд та нарын хүүхдүүдийг хонь гаргаж байгаа юм шиг төхөөрдөг үе ирнэ
Энэ сарын 18-19-нд шилжих шөнө Сүхбаатар дүүргийн 3 дугаар хорооны нутаг дэвсгэрт үйл ажиллагаа явуулдаг “Канте” шөнийн цэнгээний газрын гадаа талбайд болсон зодоон олон нийтийн анхаарлын төвд байна. Учир нь зодуулсан хүүгийн бие муу, ГССҮТ-д эмчлүүлж байгаа юм. Түүний нүдний цаад талын аяганы яс нь уначихсан гэх мэдээллийг хохирогчийн аав зөв.мн сайтад өгчээ.
Мөн тэрбээр цахим хуудастаа "Хар тамхи хэрэглэсэн баян айлын хүүхдүүд та нарын хүүхдүүдийг хонь гаргаж байгаа юм шиг төхөөрдөг үе ирнэ" хэмээн бичээд байгаа билээ.
Сануулахад, “Эрэл” ХХК-ийг үүсгэн байгуулагч Б.Эрдэнэбатын хүү 29 настай Тэмүүлэн, УИХ-ын гишүүн асан “GEM групп”-ийн эзэн, улсын гарди Ц.Цэрэнпунцагийн хүү 28 настай С нарыг бусдыг хэрцгийгээр зодож, танхайрсан хэмээн 48 цагийн хугацаанд саатуулаад буй. Тодруулбал, Нийслэлийн прокурорын газраас сэжигтэн Эрдэнэбатын Тэмүүлэн, Цэрэнпунцагийн С нарыг Эрүүгийн хэрэг хянан шийдвэрлэх тухай хуулийн 31.4 дүгээр зүйлийн 1 дэх хэсгийн 1.4 дэх заалтад заасан “гэмт хэрэг үйлдсэн гэх хангалттай үндэслэл байгаа, түүнчлэн дахин гэмт хэрэг үйлдэх, гэмт хэргээ төгсгөх үндэслэл байгаа бол” гэх үндэслэлээр баривчлах саналыг тус шүүхэд хүргүүлсэн.
Шүүхээс Эрдэнэбатын Тэмүүлэнг 2025 оны 07 дугаар сарын 20-ны өдрийн 21 цаг 40 минутаас, Цэрэнпунцагийн Санжаачойпэлийг мөн өдрийн 22 цаг 00 минутаас сэжигтнээр тус тус баривчилсан байдаг.
Улмаар Эрдэнэбатын Тэмүүлэнг сэжигтнээр баривчлах хугацаа 2025 оны 07 дугаар сарын 22-ны өдрийн 21 цаг 40 минутаас,
Цэрэнпунцагийн С-г сэжигтнээр баривчлах хугацаа 2025 оны 07 дугаар сарын 22-ны өдрийн 22 цаг 00 минутад дуусч байгаа юм. Тэднийг үргэлжлүүлэн хорих эсэх нь одоогоор тодорхойгүй байна.
Мөн уг хэрэгт Ц.С, Э.Тэмүүлэн нараас гадна хоёр иргэнийг эрэн сурвалжилж байгаа хэмээн цагдаагийн байгууллагаас мэдээлсэн. Тус иргэний нэг нь "Таванбогд" группийн захирал Ц.Баатарсайханы хүү Б.Амарсайхан юм. Гэвч тэрбээр энэ сарын 20-ны өдөр Монгол Улсын хилээр гарч явсан байна. Ингэхдээ "Найз охины бие муу байгаа тул оччихоод энэ сарын 27-нд буцаж ирнэ" хэмээгээд явсан байна.
