Хилээр оргон зугтсан “Говь“ ХК-ийн Гүйцэтгэх захирал Б.Амарсайханаас болж, хэргийн шийдвэрлэх явц удааширч байна
Зодооны хэрэгт холбогдож, Интерполоор эрэн сурвалжлагдаж буй “Таванбогд” группын захирал Ц.Баатарсайханы хүү, "Говь" ХК-ийн Гүйцэтгэх захирал Б.Амарсайхан хил давж зугтаад 40 гаруй хонож байна. Тэрбээр зодооны хэрэгт холбогдсоныхоо дараахан буюу өнгөрсөн наймдугаар сарын 20-нд Монгол Улсын хилээр гарч явсан байдаг. Ингэхдээ хуулийнханд "Найз охины бие гэнэт муудсан. Зайлшгүй очих шаардлагатай байна. Наймдугаар сарын 27-нд буцаж ирнэ" гэж хэлээд хил давж явсан юм.
Гэвч тэрбээр хуулийн хугацаандаа ирээгүй.
Тиймээс хуулийн байгууллагаас Интерполын төв товчоонд Б.Амарсайханыг Интерполын Улаан булангаар эрэн сурвалжлуулах хүсэлтээ хүргүүлснээр Интерполын Улаан булангаар эрэн сурвалжилж буй аж.
Тэгвэл Б.Амарсайхан хил давж зугтснаас болж, хэргийн шийдвэрлэх явц удаашралтай байна. Өөрөөр хэлбэл, хэргийг шалгаж, дараа дараагийн байгууллага руу шилжүүлэх процесс гацсан байдалтай байгаа талаар эх сурвалж мэдээлж байна. Учир нь уг зодооны хэрэгт 3-4 хүн шалгагдаж байгаа тул Б.Амарсайханы мэдүүлэг чухал байгаа аж. Гэтэл тэрбээр өнөөдрийг хүртэл ирээгүй, хуулийнхантай ямар ч холбоо бариагүй мөрдөн байцаалтад саад учруулж, хоригдож буй найзуудыгаа "чирсээр" байна.
Өөрөөр хэлбэл, Б.Амарсайхан хурдан ирж мэдүүлэг өгснөөр уг хэрэг прокурор, шүүх рүү шилжиж, хэрэгт холбогдоод буй залуус буруугүй бол суллагдах, буруутай бол ялаа ав шийтгэлээ авах гэх мэт дараа дараагийн ажиллагаа хийгдэх юм байна.
Сануулахад, Б.Амарсайханыг ирсэн даруйд хар тамхины тест авах байсан. Хар тамхины тестийн илрэх хугацаа 30 хоног дотроо байдаг аж. Харин өдгөө 40 гаруй хоног өнгөрсөн тул хар тамхины тест авах ажиллагаа талаар өнгөрч байна.
Хэрэг явдлыг сануулбал, Сүхбаатар дүүргийн III хорооны нутаг, ХААН банк байрлаж буй байрны эсрэг талд орших “Cante” гэх шөнийн цэнгээний газрын үүдэнд өнгөрсөн наймдугаар сарын 18-19-нд шилжих шөнийн 03.45 цагийн үед зодоон болж, нэг залуу хүнд гэмтсэн байдаг. Уг хэрэгт Б.Амарсайхан, Э.Тэмүүлэн, П.Санжаачойпэл, Л.Алтан-Очир нарын 4 хүн холбогдож, өдгөө Б.Амарсайханаас бусад гурав нь цагдан хорих 461 дүгээр ангид саатуулагдаж байна.
