Улсын начин Ө.Батзул агсны амь нас хохирсон хэргийг шүүх хурал энэ сарын 23-нд болно

Улсын начин Ө.Батзул агсны амь нас хохирсон зам тээврийн ослын хэргийг шүүх хурал энэ сарын 23-нд Сэлэнгэ аймгийн Сайхан сум дахь сум дундын Эрүүгийн хэргийн анхан шатны шүүхэд болно. Тус шүүх хурал энэ сарын 16-ны өдөр товлогдсон ч шүүгдэгч Ц.Отгонбат хохирол нөхөн төлөх тав хоногийн завсарлага авсан юм.

Хэргийг эргэн сануулбал, Орхон аймгийн Баян-Өндөр сумын харьяат, Улсын начин Ө.Батзул өнгөрсөн оны долдугаар сарын 30-ны өдөр зам тээврийн ослын улмаас амь насаа алдсан хэрэг гарсан.

Ө.Батзул нь 1994 онд Орхон аймгийн Баян-Өндөр сумд төрж бага наснаасаа үндэсний бөхөөр хичээллэхдээ үндэсний бөхөөр 2016 онд “Аймгийн харцага”, 2020 онд “Аймгийн арслан”, 2022 онд “Монгол Улсын начин” цол тус тус хүртсэн билээ.

Бөхийн чөлөөт барилдаанаар хичээллэн Ази тивийн аварга шалгаруулах тэмцээний хошой "Мөнгөн медаль", Дэлхийн аварга шалгаруулах тэмцээний шагналт тавдугаар байр, Монгол Улсын аварга шалгаруулах тэмцээнд дөрвөн удаа түрүүлсэн, эх орныхоо нэрийг дэлхийд дуурсгасан, олон улсын хэмжээний мастер цолтой, уран хурц, түргэн шуурхай барилдаантай бөх байсан юм.