Ерөнхий сайдыг огцруулах асуудлыг өнөөдөр ТББХ-ны хуралдаанаар үргэлжлүүлэн ХЭЛЭЛЦЭНЭ
Өнгөрсөн долоо хоногийн баасан гарагт УИХ-ын Төрийн байгуулалтын байнгын хороо хуралдаан Ерөнхий сайд Г.Занданшатарыг огцруулах асуудлыг хэлэлцэж эхэлсэн. Гэвч ажлын цаг дууссан шалтгаанаар даваа гарагийн 11.00 цаг хүртэл хойшлуулаад байсан юм.
Харин даваа гарагт ТББХ-ны хуралдаан эхэлсэн хэдий ч ирцээ бүртгүүлсэн гишүүд танхимд орж ирээгүй тул байнгын хорооны дарга Ц.Сандаг-Очир хуралдааныг хааж, тодорхойгүй хугацаагаар хойшлуулсан байдаг.
Тэгвэл өнөөдөр 09.00 цагаас Төрийн байгуулалтын байнгын хорооны хуралдаан товлогдоод байна. Өөрөөр хэлбэл, 10.00 цагаас эхлэх УИХ-ын чуулганы хуралдаанаар Ерөнхий сайдын асуудлыг хэлэлцэн эцэслэх тул наана нь ТББХ-г хуралдуулан санал, дүгнэлтээ гаргахаар болж байгаа юм.
Бид өнөөдөр хуралдах ТББХ болон УИХ-ын чуулганы хуралдааны явц, шийдвэрийн талаар цаг тухайд нь мэдээлэх болно.
