Х.Нямбаатар: Н.Энхбаяр таниас болж Билэгт, Батбаяр гээд үе үеийн Хотын дарга нар шоронд суусан

Хотын дарга Х.Нямбаатар өнөөдөр шуурхай зөвлөгөөний хурлынхаа үеэр Монгол Улсын 3 дахь Ерөнхийлөгч Н.Энхбаярт хандаж, үг хэлжээ.

Тэрбээр Нийслэл алдагдсан өмчүүдээ эргүүлэн авах ажил дуусаагүй. Энэ ажлын хүрээнд “Өргөө” зочид буудлыг эргүүлэн авна. Хуучнаар гутлын 22, одоогийн “Өглөөний гудамж”-нд байрлах “Өргөө” зочид буудлыг Монгол Улсын гурав дахь Ерөнхийлөгч Н.Энхбаярын хамаарал бүхий хүмүүс 10 гаруй жил хууль бусаар эзэн суулаа. Энэ хүмүүсийг гаргаж, нийслэл өмчөө эргүүлж авна. Хүн бүр хууль, шүүхийн өмнө тэгш эрхтэй байх ёстой.

Ерөнхийлөгчөөр ажиллаж байсан хүн бусдаас давуу эрх эдэлж, нийслэлийн өмчийн үл хөдлөх хөрөнгийг хууль бусаар авч, өчнөөн жил өмчилдөг байж таарахгүй. Энэ асуудалтай холбоотойгоор өмнө нь Нийслэлийн Засаг дарга бөгөөд Улаанбаатар хотын захирагчаар ажиллаж байсан хүмүүс асуудалд орсон тохиолдол бий. Би энэ алдааг давтахгүй. Ийм асуудлыг хүлээн зөвшөөрөхгүй. Н.Энхбаяр та Өргөө зочид буудлаа суллаж өгөөрэй. Таниас болж Билэгт, Батбаяр гээд үе үеийн Хотын дарга нар шоронд суусан. Би дараагийнх нь болмооргүй байна. Та Д.Сумъяабазар даргыг шахаж байгаад Хуримын ордны ард газар авсан байна лээ. Нийслэлийн иргэдийн өмчийг буцааж өгнө үү. Надад алдах юм байхгүй учраас би айхгүй" гэжээ.