Намын даргын илтгэлийг бүртгэлтэй Л.Оюун-Эрдэнэ тавих уу, тамгатай Д.Амарбаясгалан тавих уу

МАН-ын Их хурлыг угтсан улс төрийн сүүлийн “сум” өнөөдөртөө эхэлж, маргаашдаа багтаж өндрийг авах байх. Тэгвэл үүнээс урьтаж энгийн юм шиг хэрнээ энгүй их хэрүүл дагуулж болзошгүй нэг сэдвийг анхаарахгүй бол болохгүй нь. Магадгүй МАН-ын генсек Я.Содбаатар тэргүүтэй Их хурал зохион байгуулагчдын хувьд энэ нь жинхнээсээ “шүдний өвчин” болж мэднэ.

Тодруулбал, Ардын намын Их хурлын эхэнд тавигдах намын даргын улс төрийн илтгэлийг хэн тавих вэ гэдэг асуулт юм.

Дээд шүүхэд бүртгэлтэй байгаа ч өргөдлөө өгч, тамгаа шилжүүлсэн Л.Оюун-Эрдэнэ үү. Дээд шүүхэд бүртгүүлж амжаагүй ч Бага хурлаасаа сонгогдон тамгаа авч, намын албан ёсны мэдээллийн цахим хуудас дээрээ дарга гэж бичигдсэн Д.Амарбаясгалан уу.

21 аймаг, 9 дүүргээс ирсэн МАН-ын гишүүд яг хэнийх нь илтгэлийг сонсоод хурлаа эхлүүлэх бол...

Яг бичиг цаасаа харвал Л.Оюун-Эрдэнэ дарга нь байгаа.

Мэдээж Д.Амарбаясгаланг намын даргаар УДШ бүртгэж аваагүй. Гэхдээ л түүнд Л.Оюун-Эрдэнэ тамга тэмдэг, өрөө саваа хүртэл тушаачихсан. Дээр нь нэмээд түүнийг намын дарга болсон гэдэгт итгэж яваа гишүүд ч цөөнгүй.

Хэрвээ Л.Оюун-Эрдэнэ намын даргаараа бүртгэлтэй хэвээрээ гэж үзвэл Их хурлынхаа өмнө Д.Амарбаясгалангаасаа тамга тэмдгээ буцаагаад авах юм уу. Эсвэл даргын төлөөх хэрүүл нь галтай байгааг улам бүр өрдөх мэт Д.Амарбаясгалангаараа намын даргын илтгэлийг тавиулах хэрэг үү. Ёстой үүнээс өөр жонхуу, бантан гэж Ардын нам дотор өнөөдөр алга.

Аль ч нам, ялангуяа Ардын намын хувьд ажлаа өгч буй, ажлаа авч буй хоёр даргын илтгэл маш чухал байдаг. Нэг нь өнгөрсөн хугацааны алдаа оноогоо дүгнэж, тайлангаа тавьж өөрийн легасигаа үлдээдэг. Нөгөөх нь ирээдүйд ямар бодлого баримталж намаа авч явахаа зарладаг бодлого байдаг юм.

Ингээд бодохоор ялихгүй юм шиг хэрнээ яг цагаа тулахад МАН-ынхан дунд багагүй хэрүүл тарьж мэдэх зүйл байж магадгүй. Хэрвээ Д.Амарбаясгалан Их хурал дээрээ намын даргад өрсөлдвөл өөрийгөө “Би нэгэнт дарга болчихсон. Намайг албан ёсоор баталгаажуулж өгнө үү” гэдэг өнцгөөр оролцох нь лавтай. Тийм байхад Л.Оюун-Эрдэнэ даргын дүрээр орж ирвэл хүлээн зөвшөөрөгдөх байдал нь үгүйсгэгдэнэ.

Харин Л.Оюун-Эрдэнэ гарч ирээд намын даргын илтгэл тавивал Бага хурлаас Д.Амарбаясгаланг сонгосон шийдвэрийг хүчингүй гэж үгүйсгэнэ.

Ер нь яаж бодсон намын даргын илтгэл тавихгүй байсан нь дээр ч байж мэднэ шүү.