Б.Эрдэнэсүхийн хэргийг шүүхээр гэм буруутайг нь тогтоохоос нааш чөлөөлөхгүй ХУУЛЬТАЙ ч Ёсзүйн хариуцлага тооцож, чөлөөлөхийг иргэд шаардаж байна

НИТХ-ын төлөөлөгч Б.Эрдэнэсүх 22 жилийн турш эхнэрээ зэрлэгээр зодож, гэр бүлийн хүчирхийлэл үйлдсэн нь ил болоод буй. Улмаар олон нийт түүнийг төрийн өндөр албан тушаал хашиж, иргэдийг төлөөлөх ёсгүй гэж үзэн, эргүүлэн татахыг шаардаад буй.

Тэгвэл Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд заасанчлан дараах тохиолдолд НИТХ-ын төлөөлөгчийн бүрэн эрхийг дуусгавар болгох аж. Үүнд:

41 дүгээр зүйл. Иргэдийн Төлөөлөгчдийн Хурлын төлөөлөгчийн бүрэн эрх дуусгавар болох

41.1. Иргэдийн Төлөөлөгчдийн Хурлын төлөөлөгчийн бүрэн эрх дараах үндэслэлээр хугацаанаас өмнө дуусгавар болно:

41.1.1. нас барсан;

41.1.2. хүндэтгэн үзэх бусад шалтгаанаар чөлөөлөгдөх хүсэлтээ өөрөө гаргасан;

41.1.3. гэмт хэрэг үйлдсэн болох нь шүүхийн хүчин төгөлдөр шийтгэх тогтоолоор батлагдсан;

41.1.4. тухайн орон нутгаас шилжсэн;

41.1.5. энэ хуульд өөрөөр заагаагүй бол төрийн жинхэнэ албан тушаалд томилогдсон;

41.1.6. энэ хуулийн 40.1-д заасныг зөрчсөн;

41.1.7. Хурлын төлөөлөгчийн ёс зүйн дүрмийг удаа дараа, эсхүл ноцтой зөрчсөн;

41.1.8. Аймаг, нийслэл, сум, дүүргийн иргэдийн Төлөөлөгчдийн Хурлын сонгуулийн тухай хуульд заасан үндэслэлээр төлөөлөгчөөр сонгогдсонд тооцсон тухай шийдвэр хүчингүй болсон тохиолдолд бүрэн эрхийг дуусгахаар хуульчилжээ. Түүнчлэн,

41.2. Хурлын төлөөлөгчийг энэ хуулийн 41.1.2, 41.1.4, 41.1.5-д заасан тохиолдолд чөлөөлөх, 41.1.6, 41.1.7-д заасан тохиолдолд огцруулах тухай асуудлыг иргэдийн Төлөөлөгчдийн Хурлаар хэлэлцэж шийдвэрлэхээр хуульчилсан байна.

Тэгвэл Б.Эрдэнэсүхийн энэхүү ёс зүйгүй үйлдэлд дургүйцсэн иргэд түүнийг нэн даруй төрийн албанаас чөлөөлж, хуулийн хариуцлага тооцохыг шаардаж буй бөгөөд түүний харьяалагддаг Ардчилсан нам ч гишүүндээ хариуцлага тооцох нь зүй ёсны асуудал юм.