"ДАРГА" ХОТ: НИТХ-ын 45 төлөөлөгчийн 37 нь нийслэлийн өмчит компанийн УЗ, ТУЗ-д, зарим нь 7-д нь хүртэл “виз”-ээ даруулжээ

Сүүлийн жилүүдэд нийслэл гэх "улс"-тай болсон талаар шүүмжлэл улс төрчид төдийгүй олон нийтийн дунд ч ихээр хөврөх болсон. Хотын бүтэц томорч, төсөв хөрөнгө нь тэлэхийн хэрээр дарга, удирдах албан тушаалын тоо ч анхаарал татах болсон нь үнэн.

Тэгвэл нийслэлийн бодлого, шийдвэрийг хэлэлцэж, хяналт тавих учиртай НИТХ-ын төлөөлөгчид өөрсдөө нийслэлийн өмчит компаниудын удирдлагад хэр оролцдог вэ гэдэг асуултыг эл нийтлэлээрээ хөндөж байна. НИТХ нийт 45 төлөөлөгчтэй.

Гэтэл зарим төлөөлөгч нар нэг биш, хоёр ч биш бүр долоон компанийн УЗ, ТУЗ-д нэгэн зэрэг багтсан байх нь бий.

Тодруулбал, өнгөрөгч наймдугаар сарын 10-ны өдөр нийслэлийн өмчит болон өмчийн оролцоотой хуулийн этгээдийн Удирдах зөвлөл болон Төлөөлөн удирдах зөвлөлийн гишүүдийг шинэчлэн томилох тушаал гарчээ. Тус тогтоол ёсоор нийт 43 байгууллагад давхардсан тоогоор 287 хүнийг томилжээ.

Гэхдээ энд анхаарал татах нэг өнцөг бий.

Өнгөрөгч хавар УИХ-ын Төсвийн байнгын хорооноос "Нийслэлийн 2024-2026 оны төсвийн зарцуулалт, хөрөнгө оруулалтын төслүүдийн хэрэгжилт холбогдох хууль тогтоомжид нийцсэн байдал" ерөнхий хяналтын сонсголыг зохион байгуулсан. Тус сонсголын үеэр шинжээч нарын дүгнэлтээр НИТХ-ын 45 төлөөлөгчөөс 43 нь нийслэлийн өмчит болон өмчийн оролцоотой хуулийн этгээдийн ТУЗ-ийн дарга, гишүүнээр ажиллаж нийт 104 суудлыг эзэлж байгаа нь ил болсон юм.

Тэгвэл НИТХ-ын дарга Д.Ихбаярын гарын үсгээр баталгаажсан наймдугаар сард гарсан тушаалаас харахад, НИТХ-ын 45 төлөөлөгчийн 37 нь нийслэлийн өмчит болон өмчийн оролцоотой хуулийн этгээдийн Удирдах зөвлөл болон Төлөөлөн Удирдах зөвлөлд ажиллаж нийт 127 суудлыг эзэлж байна. Өөрөөр хэлбэл, НИТХ-ын төлөөлөгчдийн суудлын тоо өмнөхөөсөө 23-аар нэмэгдсэн гэсэн үг юм.

Үүнийг нарийвчилж авч үзвэл, УЗ болон ТУЗ-ийн гишүүнээр ажиллах НИТХ-ын төлөөлөгчид хамгийн ихдээ 7 байгууллагын ТУЗ-д давхар ажиллахаар байна. Тухайлбал, НИТХ-ын төлөөлөгч А.Амартүвшин эдгээрээс хамгийн өндөр буюу 7 ТУЗ, УЗ-д багтсан байна. Түүний хувьд “Түлш хэрэглэгчдэд үйлчлэх төв” ОНӨААТҮГ, “Коп-17 хөрөнгө оруулалт, бүтээн байгуулалтын газар” ОНӨААТҮГ, “Урт цагаан үйлчилгээний төв” ОНӨААТҮГ, “Туулын хурдны зам” ОНӨААТҮГ, “Тархмал эрчим хүчний дэд бүтэц” ХХК, “Олон улсын худалдаа логистикийн төв" ХК, “Багахангайн үйлдвэрлэл, технологийн парк” ХК-д ажиллаж байна.

Тодруулбал, УЗ/ТУЗ-ийн бүрэлдэхүүнийг ерөнхийлөн авч үзвэл

• 7-д 1 төлөөлөгч,
• 6-д 1 төлөөлөгч,
• 5-д 4 төлөөлөгч,
• 4-т 11 төлөөлөгч,
• 3-т 11 төлөөлөгч,
• 2-т 6 төлөөлөгч,
• 1-д 3 төлөөлөгч байна гэсэн үг юм. Өөрөөр хэлбэл, НИТХ-ын төлөөлөгчдийн 82 хувь нь Нийслэлийн өмчит болон нийслэлийн өмчийн оролцоотой хуулийн этгээдийн Удирдах зөвлөл болон Төлөөлөн удирдах зөвлөлийн бүрэлдэхүүнд "виз"-ээ даруулсан гэсэн үг юм.