Б.Пүрэвдагва: Багануур, Багахангай, “Чингис хаан“ ОУНБ чиглэлд зорчих иргэд автобусны суудлаа урьдчилан захиалж болно

"Чингис хаан" ОУНБ, Багануур, Багахангай чиглэлийн автобусанд суудал захиалах боломжтой болоод буй. Харин Хотын дарга Б.Пүрэвдагвын зүгээс "Автобусны суудлыг цахимаар урьдчилж захиалах туршилт явагдаж байгаа. Ирэх цаг нь тодорхойгүй, удаан хүлээлгэдэг байдлыг зохицуулна" гэж мэдэгдсэн нь олны дунд төөрөгдлийг төрүүлээд амжсан. Тэгвэл эл асуудлын талаар тэрбээр залруулга хийлээ.

Тэрбээр "Иргэдээсээ хүлцэл хүсье. Багануур, Багахангай, "Чингис хаан" олон улсын нисэх буудал чиглэлд зорчих иргэд автобусанд суудлаа урьдчилан захиалах үйлчилгээг “бүх нийтийн тээвэр” хэмээн зарим талаар буруу ташаа ойлгуулсан байна.

Зөвхөн дээрх чиглэлд зорчих бол нийслэлчүүд Та бүхэн UB CARD аппликэйшнээр дамжуулан суудлаа урьдчилан захиалж болно.

“Улаанбаатар хотын алслагдсан дүүргийн иргэдэд нийтийн тээврийн үйлчилгээг илүү хүртээмжтэй хүргэх зорилгоор суудал захиалгын үйлчилгээг туршилтаар хэрэгжүүлж эхэлсэн. Өнгөрсөн хугацаанд 1100 орчим иргэн уг үйлчилгээг ашигласан байна" гэв.