нямбаатар

Намын даргаа бацаанаар нь дуудаж, уушгиныхаа гурван судас тасартал тэмцэнэ хэмээн намын нөхдөдөө үг хаяж явснаа гэнэтхэн л тамга, тэмдгээ ч биечлэн өгөхгүйгээр "сураггүй болсон" экс Хотын дарга маань саяхнаас амь оров. Наадмын өмнөхөн гадаадад сурч байгаагаа сошиалд бичиж байсан тэрбээр саяхан монголд ирсэн талаараа ээлжит хийцтэй цайны влогоороо мэдэгдээд амжсан юм. Гэвч олон нийтэд түүний хийцтэй цайнаас илүүтэйгээр улс төрийн хувьд олон зүйл дээр ам нээх болов уу гэж хүлээлт байсан нь дамжиггүй.

Улс төрд санамсаргүй зүйл гэж үгүй. Энэ утгаараа намрын улс төр эхлэхийн өмнө түүний амь орж буй гол шалтгаан нь нийслэлийн намын даргын албан тушаалтай нь холбоотой байж болох юм. Учир нь ирэх есдүгээр сард нийслэлийн МАН-ын даргын асуудал яригдаж магадгүй талаар бор шувуу аль хэдийнэ нисээд эхэлсэн. МАН-ынхан ч ийм хүлээлттэй байгаа. Үнэндээ өнгөрсөн хавар Х.Нямбаатарыг Хотын даргын ажлаа өгөх өдрийг хүртэл энэ асуудал эрчимтэй яригдаж байсан ч намжиж орхисон. Тухайн үед УИХ-ын гишүүн Э.Бат-Амгалангийн нэр хамгийн хүчтэй яригдаж байсан ч саяхнаас Н.Учрал түүнд эл албан тушаалыг өгөхгүй байх талдаа гарсан гэдгийг ч эх сурвалжууд хэлж байна. Хэрэв энэ байр суурь нь намар хүртэл хэвээр үргэлжилбэл одоогийн Хотын дарга Б.Пүрэвдагвад нийслэлийн намаа авч өгөх хувилбар хэрэгжих боломжтой.

Нөгөө талдаа Х.Нямбаатар бол зүгээр сууж байгаад нийслэлийн намаа "Май" гээд өгчих хүн огтоос биш. Түүнийхээ урьтал болгож, саяхнаас амь орж эхэлсэн нь лав. Голын эрэг дээрх мэдэгдэл дээрээ хүртэл эрх баригчид, тэдний худал хуурмаг, нийгмийн сүлжээнд "идэвхтэй" байна гэх үгнүүдийг нэлээн чулуудаж харагдсан. Энэ нь нийслэлийн намаа тийм ч амархан тавиад туучихгүй шүү гэх Н.Учрал руу чиглэсэн сануулга гэлтэй. Ямартай ч энэ бүх үйл явцаас харахад, халуухан хавар үргэлжилж, "Халуухан намар" болох шинжтэй...