С.Одонтуяа Шадар сайд, Ц.Туваан ХХААХҮ-ийн сайд, Н.Ганибал Барилга хот, байгуулалтын сайдад ЯРИГДАЖ, Т.Доржханд ТАТГАЛЗСАН байдалтай байна

Edited by Ubn.mn

Улс төрийн үйл явц “халуухан” өрнөж байна. Ардын намын хамгийн “бүдүүн” эрх мэдэлтэй дарга Л.Оюун-Эрдэнэ нь хамтарсан засаг байгуулна гэдгээ хэлж, 62 гишүүнтэй “бүдүүн” бүлгийн гишүүдийнхээ 3/2-г нь мэл гайхуулж, цэл хөхрүүлэв.

Т.Доржханд тэргүүтэй ХҮН-ынхан засагт орохоос татгалзсан хэвээрээ байна

Цэцийн рүү гомдол “зөөж” гүйхээс эхлэлтэй энэ тохироонд ХҮН, АН хоёулаа багтаж байгаа. Харин эх сурвалжийн мэдээлж буйгаар МАН-ын хутгаж буй энэ “холимог хуурга”-нд Т.Доржханд тэргүүтэй ХҮН-ынхан орохгүй гэдэг байр сууриа баттай хамгаалж буй аж. Уг нь МАН тэдэнд сайдын хоёр суудал санал болгосон. Гэвч тэд өнөөдрийн улс төрөө биш ирээдүйн улс төрөө харна гэх утгатай зүйл хэлээд тас гүрийжээ.

С.Одонтуяа Шадар сайд, Ц.Туваан ХААХҮ-ийн сайд, Н.Ганибал Барилга, хот байгуулалтын сайд болохоор тохирчээ

Харин нөгөө талд нь өнөөдрийн хамгийн халуухан сэдвийн эзэд болох АН-ын бүлгийнхэн сайд болохоор нэгэнт шийдэж нүд, шүдээ тас зангиджээ. Одоо тэдэнд намын гишүүдийнх нь шүүмжлэл, олон нийтийн дургүйцэл түй ч хамаагүй. АН-ыг засагт оруулах яриа өнгөрсөн долоо хоногт гарахтай зэрэгцэж зарим бодитой эх сурвалжууд “АН-ын бүлгийн даргаар сонгогдсон хүн МАН-тай хамтрах гэрээнд гарын үсэг зурах тул АН-ынхан хэнийг энэ “шавартай” ажлыг хийлгэхээ хараахан шийдээгүй байгаа” гэж байсныг бид мэдээлсэн.

Тэгвэл МАН-ын байгуулах шинэ Засгийн газарт АН-аас 3-4 суудал гэж тохирсон. Ээлжит бус чуулган эхлэхтэй зэрэгцэж дахиад нэмж сайд нэхсэн ч МАН-ынхан “дунд” хуруу үзүүлсэн сурагтай.

Эх сурвалжийн мэдээлж буйгаар АН-аас УИХ-ын дэд дарга С.Одонтуяа Шадар сайдад, Ц.Туваан Хөдөө аж ахуй, хөнгөн үйлдвэрийн сайдад, Н.Ганибал Барилга хот байгуулалтын сайдын суудлыг авахаар эрх баригчидтай тохирсон байна. Мөн УИХ-ын гишүүн Б.Пүрэвдоржийг Засгийн газарт оруулах сонирхлоо МАН-ынхан илэрхийлсэн ч мань тэр саналыг нь хүлээж авахгүй гээд гадагшаа “зугтжээ”.

Ц.Туваан “Би сайд болъё” гэжээ

Тохироо, улс төрийн наймааны хувьд нэг иймэрхүү байдалтай саарал ордон үргэлжилж байна. АН-тай тохирсон энэ яриа өчигдрийн тохироо бөгөөд энэ амралтын өдрүүдэд өөрчлөгдчихгүй бол энэ хэвээрээ орох биз. Харин үлдсэн нэг сайдын суудлыг АН-аас хамгийн хурдтай хэн гүйнэ, тэр хүнд нь очих байх. Гэхдээ Ерөнхий сайд хурдалсан болгонд нь тийм ч амархан арай ч өгөхгүй байх. Өөрөөр хэлбэл, үлдсэн нэг квотыг Ж.Батсуурь, Д.Бат-Эрдэнэ, О.Цогтгэрэл гурвын нэгийг сонгож таалах биз. Магадгүй бүлгийн дарга болсон гэдэг утгаараа О.Цогтгэрэл сугарч үлдэээд нөгөө хоёр нь учраа олох нигууртай. Д.Ганбат, Ш.Адьшаа нарт сайдын суудал өгчихөөд тайван суух хүн энэ дэлхий дээр лав байхгүй. Тиймээс тэдний тооцооноос автоматаар хас.

Гэхдээ АН-ыг засагт орох гэж байгаа улс төрийг эрүүл ухаанаар харахад айлын хаяа хатавчинд очиж суутлаа үнэхээр “өлсөж” дээ гэхээс өөр хэлэх үг алга. Хоёр парламент дараалаад засаглаж буй МАН-ын эсрэг хүчтэй сөрөг хүчин байгаасай гэж ард түмэн энэ 11 гишүүнийг сонгосон болохоос эрх баригчдын “хөнжил, гудас” руу шалдан биеэрээ шургалаадах гэж сонгоогүй.

Ядаж энэ хэдээсээ арай л дорвитой сөрөг хүчин хийдэг Б.Пүрэвдорж нь асуудлаас зугтаад алга болсон чигээрэй үлдээсэй билээ. АН-ын бүлгийн талаар өөр хэлэх өөр муу үг олдохгүй байна. Арай ч МАН-ынхан АН-ыг засагтаа оруулчихгүй байлгүй дээ.

Г.Лхагвадорж