З.Энхболд: Нямбаатар сайдаа намайг гүтгэхийн оронд “Нүүрсний хулгайч“-аа МАН дотроосоо хай гэж зөвлөе
Нүүрсний хулгайн хэрэгтэй холбогдуулан ХЗДХ-ийн сайд Х.Нямбаатараар ахлуулсан ажлын хэсэг өдөр бүр мэдээлэл хийж буй. Өчигдрийн мэдээллээр ХЗДХ-ийн сайд Х.Нямбаатар АН-ын дарга асан З.Энхболдыг нүүрсний хулгайн хэргээр баригдаад буй "Хишиг арвин индустриал" компанитай хамааралтай гэх мэдэгдлийг хийсэн. Уг асуудалд АН-ын дарга асан З.Энхболд тайлбар өгөв.
Тэрбээр "2022 оны арванхоёрдугаар сарын 8-нд МАН-ын Хууль зүйн сайд Нямбаатар намайг "Хишиг арвин индустриал" компанитай хамааралтай гэж зарлав. Уг нь ямар ч хамааралгүй болохыг холбогдох төрийн байгууллагууд тогтоогоод 2 жил болсон юм. 2020 оны хавар УИХ сонгууль болохтой холбогдуулан намайг энэ компанийн эзэн мэтээр гүтгэхээр нь баахан тодорхойлолт цуглуулж хамааралгүйгээ нотолж байсан.
Хэрвээ 1937 он байсан бол "Лхүмбийн хэрэгт" хамааралтай З.Энхболдыг маргааш нь цаазаар авах байсан байх. Тэр үеийн хууль зүйн сайд улаан хувьсгалч Дорж цагдаа шиг мөрдөн байцаагаад, прокурор нь болж хянаад, шүүгч болж шийдвэр гаргаад тэр дор нь жанжаан буудчих уу гээд дуусаа. Аз болоход 2022 оны 12-р сарын 9-нд би "нүүрсний хулгайч" гээд буудуулчихаагүй. Учир нь өнөөдрийн МАН 37 оны МАХН биш, Нямбаатар сайд улаан хувьсгалч Дорж шиг хүн буудах эрхгүй. Хэн нэгнийг хамааралтай хулгайч гэж хэлэхийн тулд эхлээд Хишиг арвинг нүүрсний хулгайч гэж тогтооно, хэдэн оны хэдэн сард хэдэн тонн нүүрс хаанаас хулгайлсан бэ гэж мөрдөн байцаалт явуулна. Тэрийг нь прокурор гээд өөр хүн хянана. Компани нь өөрийгө өмгөөлөх өмгөөлөгч авна. Тэгээд шүүх дээр очиж дахиад өөр шүүгч гэдэг хүнээр шүүлгэнэ. Хишиг арвин нүүрс хулгайлсан нь тогтоогдвол З.Энхболдтой ямар хамааралтайг шүүх тогтооно гэх мэтээр олон сарын процесс явна.
2006 онд анх төрийн албан хаагчид "хөрөнгө орлогын мэдүүлэг" бөглөдөг болсноос хойш миний ХОМ АТГ дээр хадгалаастай байгаа, хүссэн хүн болгон ороод үзэж болно. Тэнд "Хишиг арвин индустриал" гэдэг компани байхгүй.
Эцэст нь хэлэхэд МАН-ын захирлыг нь тавих гээд маргалдаад улмаар УИХ-аа тараах, ЗГ-аа огцруулах дээрээ тулж байгаа ард түмний өмч Таван толгойн орд 6 тэрбум тонн нүүрсийг үнэгүй хувьчлах гэж байхад зогсоосон хүн нь би байна.
6 тэрбум биш 6 сая тонн (энэ тоог МАН өөрөө зарласан) нүүрсний хулгайчийг хурдан шуурхай хуулийн дагуу олж шийтгэх ажилд нь МАН-ын ЗГ УИХ-д амжилт хүсье.
Нямбаатар сайдад нүүрсний хулгайчаа МАН дотроос хайвал хурдан олно гэдэг зөвлөгөөг өгье. Яагаад гэвэл АН-ын гишүүд 2016 оноос хойш лааз өшиглөж байгаа учраас тэр айхтар нүүрс рүү чинь ойртох боломжгүй" хэмээлээ.
