Аравдугаар сард хувцас, гутал, орон сууцны үнэ 9 хувиар өсчээ

Эдийн засгийн гол үзүүлэлтийн нэг хэрэглээний бараа үйлчилгээний индекс буюу инфляц өнгөрсөн сард 7 хувьтай гарлаа. Энэ нь өмнөх сараас 0.3 хувиар өссөн үзүүлэлт болохыг Үндэсний статистикийн хороо мэдээллээ.

Инфляцийн өсөлтөд бензин, түлшнээс бусад импортын барааны үнэ 2.5 нэгж буюу 35.5 хувь нь нөлөөллөө. Мөн мах, хатуу түлшнээс бусад дотоодын барааны үнэ 3.4 нэгж буюу 48.1 хувиар тус тус нөлөөлжээ. Импортын бараанд тэр дундаа, хүнсний бараа, ундаа ус бүлгийн үнэ нөлөөлсөн байна. Тухайлбал, аравдугаар сард ундаа ус бүлгийн үнэ 7.7 хувиар, согтууруулах ундаа 3.8, хувцас бөс, гутал 9, орон сууц, шатахуун түлш 9, гэр ахуйн цахилгаан бараа 7.2 хувиар тус тус өсчээ.