ЭЕРЭГ: Дроноор малаа туудаг Монгол хүүхдүүдийг дэлхийн алдарт Associated Press агентлаг онцолжээ

Монголын алслагдсан аймгуудын хүүхдүүд робот угсарч, код бичин олон улсын түвшинд амжилт гаргаж эхэлснийг дэлхийн хамгийн нөлөө бүхий мэдээллийн агентлагуудын нэг AP News онцлон мэдээллээ. Юнител группийн хэрэгжүүлж буй Unitel STEAM HUB хөтөлбөр Монгол Улсын 21 аймагт хэрэгжиж, хот хөдөөгийн ялгааг арилган, хөдөө сумын хүүхдүүдийг ч дэлхийн хэмжээний технологийн боловсролтой болгох бодит үр дүнг харуулж эхэлжээ.

Өргөн уудам газар нутагтай, хүн амын сийрэг тархалттай Монгол орны нөхцөлд боловсролын хүртээмж хамгийн том сорилт болдог. Харин энэхүү хөтөлбөрөөр дамжуулан Баян-Өлгий, Хэнтий, Архангай зэрэг алслагдсан бүсийн хүүхдүүд яг ижил робот угсарч, ижил код бичиж, ижил лабораторид суралцаж байна.

AP News-ийн нийтлэлд онцолсноор, эдгээр хүүхдүүдийн зарим нь олон улсын робот, кодчиллын тэмцээнд оролцож, алт, мөнгө, хүрэл медаль хүртэж, Монголын нэрийг дэлхийн тавцанд гаргаад байна.

Мэргэжилтнүүдийн үзэж байгаагаар энэ нь Монголын хүүхдүүдийн оюуны потенциал хаана байхаас үл хамааран, зөв дэмжлэг байвал дэлхийн оргилд хүрч чаддаг гэдгийг харуулсан бодит жишээ болж байна.