Б.Мөнхбаяр: Үнэхээр хэцүү буцмаар, зогсоомоор санагдах үе олон байгааг нуухгүй
Тэрбээр Улаанбаатараас Эрдэнэт хүртэл гүйх гүйлтээ үргэлжлүүлж, нийт 260 км туулаад байгаа аж.
Энэ тухайгаа цахим хуудастаа “Үнэхээр хэцүү буцмаар, зогсоомоор санагдах үе олон байгааг нуухгүй ээ. Гэхдээ надад итгэж, дэмжиж буй гэр бүл, надтай хамт гүйж яваа багийнхан, замд таарч урам өгч, хамтдаа гүйж буй хүмүүсийн халуун сэтгэл надад дэлхийг ч өргөчихмөөр их хүч өгч байна.
Улаанбаатараас Номгон хүртэл гүйж, нийт 260 км замыг туулаад байна. Энэ аялал надад нэг зүйлийг улам тод ойлгууллаа. Гүйхийн тулд эрүүл байх хэрэгтэй. Эрүүл байхын тулд тогтмол дасгал хөдөлгөөн хийж, биеэ хайрлах хэрэгтэйг улам бүр мэдэрч явна.
Спорт гэдэг хүнд зөвхөн биеийн хүч бус, сэтгэлийн хат, тэвчээр, зорилгодоо үнэнч байх чанарыг суулгадаг нь гайхамшигтай. Намайг дэмжиж, хамтдаа урагшилж буй хүн бүхэндээ чин сэтгэлээсээ баярлалаа” гэжээ.
