Тээврийн хэрэгслийн даатгал ба Жолоочийн хариуцлагын албан журмын даатгал: ялгааг та мэдэж байна уу?

"Надад даатгал бий, тэгэхээр бүх зүйл хамгаалагдсан" гэж боддог жолооч цөөнгүй. Гэтэл Монголд машинтай холбоотой хоёр огт өөр даатгал байдаг бөгөөд аль нэгийг нь л байгаа гэдэг нь та бүхэлдээ хамгаалагдсан гэсэн үг биш. Энэ хоёрын ялгааг мэдэхгүй бол осол гарахад л гэнэт мэдэж, цочирдох тохиолдол их гардаг.

Жолоочийн хариуцлагын албан журмын даатгал

Энэ бол Монголын хуулиар **заавал байх ёстой** даатгал. Жолоочийн даатгалын тухай хуулийн дагуу тээврийн хэрэгслийн өмчлөгч бүр энэ даатгалд заавал хамрагдах ёстой бөгөөд даатгуулаагүй тохиолдолд замын хөдөлгөөнд оролцох, техникийн хяналтын үзлэгт орох, улсын бүртгэлд бүртгүүлэх эрхгүй болно.

Юуг хамгаалдаг вэ?

Зөвхөн бусдад учруулсан хохирлыг. Тухайлбал:
- Таны машинд сууж явсан зорчигчийн амь нас, эрүүл мэндэд учирсан хохирол
- Явган зорчигчийг мөргөж учруулсан хохирол
- Бусдын тээврийн хэрэгсэл, эд хөрөнгө (жишээ нь замын хайс, хашлага) мөргөж учруулсан хохирол

Юуг хамгаалдаггүй вэ?

Энд л хамгийн их ташаа ойлголт гардаг. Өөрийн машиндаа учирсан хохирлыг энэ даатгал огт нөхдөггүй. Өөрөөр хэлбэл, та буруутай осол гаргаад бусдын машиныг эвдвэл тэрнийг нь энэ даатгал төлнө, гэвч өөрийн машиныхаа засварын зардлыг та бүрэн өөрөө хариуцна.

Хураамжийн хэмжээ хуулиар тогтоосон суурь хураамж дээр үндэслэж, жолоочийн туршлага, осолдсон түүх зэрэг итгэлцүүрээр тохируулагддаг тул харьцангуй бага, стандартчилагдсан байдаг.

Тээврийн хэрэгслийн даатгал

Энэ бол **сайн дурын** даатгал.

Юуг хамгаалдаг вэ?

Энэ удаад эсрэгээрээ өөрийн машиныг. Осол, гал түймэр, байгалийн гамшиг, хулгай зэргээс шалтгаалан өөрийн машинд учирсан хохирлыг нөхдөг. Хэрэв та буруутай осол гаргасан ч (жолоочийн хариуцлагын даатгал бусдынхыг нөхөх зуур), таны өөрийн машины засварыг яг энэ даатгал л хариуцна.

Хураамжийн хэмжээ машины үнэ цэнэ, марк загвар, хуучирсан байдал, сонгосон хамгаалалтын хэмжээ (жишээ нь хариуцах хэсэгтэй эсэх, 80/20 эсвэл 100% гэх мэт), жолоочийн эрсдэлийн профайлаас шалтгаалж хүн бүрт өөр өөр байдаг.

Жишээ нөхцөл байдлаар харуулбал

Та гэнэт хажуугийн эгнээнээс гараад бусдын машинтай мөргөлдөв гэж бодъё. Уг осолд та буруутай гэж тогтоогдлоо.

- Бусдын машины засварыг жолоочийн хариуцлагын албан журмын даатгал төлнө
- Таны өөрийн машины засварыг зөвхөн тээврийн хэрэгслийн даатгалтай бол л энэ нь нөхөгдөнө.

Эдгээр хоёр даатгал бие биенээ орлохгүй, харин нөхөж, бие биенээ гүйцээж ажилладаг. Жолоочийн хариуцлагын албан журмын даатгал нь хуулийн шаардлага, бусдын өмнөх хариуцлагыг хамгаалдаг бол тээврийн хэрэгслийн даатгал нь таны өөрийн машин, өөрийн хөрөнгийг хамгаалдаг. Зөвхөн нэгийг нь л байгаа гэдэгтээ итгэлтэй байхын оронд, машинаа бүрэн хамгаалуулахыг хүсвэл хоёуланг нь зэрэг авах нь хамгийн найдвартай шийдэл юм.

Агис Даатгалын тухай

Агис Даатгал нь технологийн дэвшлийг ашиглаж, даатгалыг энгийн, шуурхай, итгэлтэй болгож харилцагч бүрт санаа амар хамгааллыг хүнлэг үйлчилгээгээр хүргэхийг зорьдог.

Бид салбартаа шинэ стандарт тогтоож, даатгалыг орчин үеийн, хялбар, хурдан үйлчилгээ болгох алхмаа даатгалын гэрээний загвар, хэл найруулгыг хэнд ч ойлгомжтой, энгийн, хураангуйлахаас эхэлсэн бөгөөд "хүртээмжтэй даатгалын"даатгалын хэлбэр буюу даатгагчийн хариуцлагыг өсгөж, даатгуулагчийн хамгаалагдахгүй эрсдэл хамгийн цөөн онлайн даатгалын бүтээгдэхүүнүүдээрээ зах зээл дээр ялгарал бий болгосон билээ.