Н.Учрал: Цахим мөрийтэй тоглоомыг бүрэн хориглолоо

Цахим мөрийтэй тоглоомыг хориглох зорилго бүхий Зөвшөөрлийн тухай хуульд нэмэлт, өөрчлөлт оруулах тухай хуулийн төсөл эцэслэн батлагдсантай холбогдуулан хууль санаачлагч ЗГХЭГ-ын дарга Н.Учрал мэдээлэл өглөө. Тэрбээр,

"Засгийн газраас цахим мөрийтэй тоглоом, бооцоот таавар, төлбөрт уралдааныг бүхэлд нь хориглох хууль санаачилж, УИХ хэлэлцэн баталлаа. Цахим мөрийтэй тоглоом, бооцоо, таавар олон мянган Монгол хүн, Монгол айлын амь амьдралд сүйрэл, зөвхөн нэг жилд 500 сая ам.доллар гадагш урсган улс орны эдийн засагт хохирол учруулсаар ирсэн. Тоглосон нь өрөнд ороод хохирол дуусдаггүй.

Бүтэн жилийн туршид бүх хүүхдэд олгох 1,7 их наяд төгрөг, улсын валютын нөөцийн 10 хувьтай тэнцэх доллар бооцоо, мөрийнд урсаж, инфляц, гэр бүл салалт, амиа хорлолт, донтолт, ажил эрхлэх хүсэл сонирхол бөхөөх гэх мэт нийгэм эдийн засгийн олон талын хор хохирол дагуулдаг.

Хууль батлагдсанаар:

-Агентуудад эрүүгийн хариуцлага хүлээлгэнэ

-Цахим мөрийтэй тоглоом сурталчилсан, уриалсан бол зөрчлийн хариуцлага хүлээнэ.

-Цахим мөрийтэй тоглоомонд Монголоос хандах эрх хууль ёсны дагуу хаагдана.

-VPN зэргийг ашиглан тоглосон тохиолдолд хуулийн хариуцлага хүлээнэ.

-Монголчуудын хөрөнгө гадагш урсах хяналтгүй суваг хаагдана.

-Харийн этгээдийн мөнгө угаалт, оффшор дамжуулалт зогсоно.

-Иргэдээ цахим залилан, эдийн засгийн гэмт хэргийн хохирогч болохоос урьдчилан сэргийлнэ.

Хууль хяналт, банк санхүүгийн байгууллага хууль хэрэгжүүлэхэд идэвх санаачилгатай ажиллахыг хүсье" гэлээ.