Ерөнхий сайд Г.Занданшатар МАН-ын даргын төлөөх өрсөлдөөнөөс нэрээ татаж буйгаа мэдэгдлээ

Энэ амралтын өдрүүдэд МАН-ын Их хурал зохион байгуулагдана. Намын Их хурлаар намын даргын сонгууль дахин өрнөх билээ. Тэгвэл нэр дэвшигчдийн нэг болох Ерөнхий сайд Г.Занданшатар нэрээ татаж буйгаа мэдэгдлээ. Түүний хувьд Бага хурлаар зохион байгуулагдсан намын даргын өрсөлдөөнд ялагдал хүлээж, УИХ-ын дарга асан Д.Амарбаясгалан ялалт байгуулсан байдаг.

Тэрбээр "Улс орны эрх ашгаа тэргүүн эгнээнд тавьж, намын дотоод асуудал төрийн зовлон болохоос сэргийлэн Монгол Ардын Намын даргын төлөөх өрсөлдөөнөөс нэрээ татаж буйгаа мэдэгдэж байна.

Улсын эдийн засаг, ард түмний амьдралд тулгамдсан олон асуудал шийдлээ хүлээж байна. Авлига, баялгийн хулгайтай хийж буй тэмцлээ тууштай үргэлжлүүлж, иргэдийнхээ орлого, цалин хөлс, тэтгэвэр тэтгэмжийг нэмэгдүүлэх, бусад тулгамдсан олон суурь асуудлыг шийдэхийн төлөө Засгийн газар улам эрчтэй ажиллах болно.

Баялгийн хулгайтай хэзээ ч эвлэрэхгүй. Надад албан тушаал бус улсын төлөө бодит ажил, ард иргэдийн итгэл илүү чухал. Байгалийн баялгаас нийт иргэн бус хэсэг бүлгээрээ хувь хүртдэг шударга бус байдлыг халахын төлөө Засгийн газрын тэргүүний хувьд тууштай тэмцэнэ" гэжээ.