Улаанбаатар зам, засвар арчлалтын газрын дарга асан Б.Галхүү, Санхүүгийн албаны дарга асан н.Лхагвасүрэн нар хууль зөрчиж, 4 компани руу 8.7 тэрбум төгрөг шилжүүлэн, өөрсдийн хамаарал бүхий иргэдийн дансаар авчээ

Нийслэлийн хэмжээнд зам засвар, арчлалтын ажил хийж гүйцэтгэдэг нэр бүхий төрийн өмчит компаниас 2024-2025 оны хугацаанд хувийн хэвшлийн 4 компани руу нийт 8.7 тэрбум төгрөгийг холбогдох хууль тогтоомжийг зөрчиж санхүүгийн анхан шатны баримтын бүрдэлгүйгээр, ажил үйлчилгээ худалдан авсан гэх нэрийдлээр шилжүүлэн албан татвар төлөхөөс зайлсхийж, мөнгө угаах гэмт хэрэг үйлдсэн байж болзошгүй хэргийг цагдаагийн байгууллагаас илрүүлжээ.

Уг үйлдлийг 2023, 2024 онд тус газрын даргаар ажиллаж байсан Г, Санхүүгийн албаны даргаар ажиллаж байсан Л нар үйлдсэн болохыг тогтоон өөрсдийн хамаарал бүхий иргэдийн данс руу их хэмжээний мөнгө шилжүүлэн авах замаар хөрөнгө завшсан, хөрөнгийн эх сурвалжийг зориуд нуух байдлаар олон тооны гүйлгээгээр дамжуулан авч мөнгө угаасан байж болзошгүй нөхцөл байдал тогтоогдсон аж.

Хэргийг Эрүүгийн хуулийн тусгай ангийн 18.6 дугаар зүйлийн 1, 22.1 дүгээр зүйлийн 1 дэх хэсэгт зааснаар үргэлжлүүлэн шалгаж байна.