Т.Даваадалайг АТГ-аас яллагдагчаар татаж, “Эрх мэдэл, албан тушаалын байдлаа урвуулан ашиглах“ зүйл ангиар шалгаж эхэлжээ

Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогчоор ажиллаж байсан Т.Даваадалай Туулын хурдны зам болон 1, 2-р тойрог замын төслөөс эхнэрийнхээ болон түүний хамаарал бүхий хүмүүсийн ААН-ийн дансаар нийт 6.6 тэрбум төгрөг шилжүүлж, мөнгө угаасан байж болзошгүй хэрэгт холбогдсон билээ. Тодруулбал,

-Туулын хурдны зам, 1-р тойрог зам төсөлд шалгарсан ААН-үүдээс эхнэрийнхээ болон түүний үеэл дүүгийн үүсгэн байгуулсан компанид 5.6 тэрбум төгрөг,

-Мөн эхнэрийнхээ найзын үүсгэн байгуулсан 2 ААН-д 709 сая төгрөг,

-Эхнэрийнхээ 50 хувийг эзэмшдэг компаниар 47.9 сая төгрөгийг шилжүүлэн авч, ажил гүйцэтгэсэн мэтээр мөнгө угаасан байж болзошгүй нөхцөл байдал тогтоогдсон талаар цагдаагийн байгууллагаас мэдээлсэн.

Тэгвэл дөнгөж саяхан АТГ-аас Т.Даваадалайг Эрүүгийн хуулийн 22.1 буюу "Эрх мэдэл, албан тушаалын байдлаа урвуулан ашиглах" зүйл ангиар яллагдагчаар татсан байна.

Дашрамд, Т.Даваадалай өчигдөр /04.29/ Нийслэлийн Засаг даргын орлогчийн ажлаас өөрийн хүсэлтээр чөлөөгдөж буйгаа мэдэгдсэн байдаг.