Булган аймгийн ИТХ өнөөдөр хуралдаж, аймгийн Засаг дарга Д.Пүрэв-Очирт итгэл үзүүлэх эсэх асуудлыг хэлэлцэж шийдвэрлэжээ. Тодруулбал Төлөөлөгчдийн 58.6 хувийн саналаар түүнийг огцруулсан байна.

Д.Пүрэв-Очир нь Хутаг-Өндөр сумын Засаг даргаар О.Далайцэрэнг томилохдоо хууль тогтоомжийг ноцтой зөрчсөн гэж үзжээ. Мөн тэрбээр Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 56 дугаар зүйлийн 56.3.2-т заасанчлан "Төрийн албанд гурваас доошгүй жил ажилласан байх" гэснийг хангаагүй ажээ.

Түүнчлэн, Төрийн албаны тухай хуульд заасан шаардлага хангахгүй иргэн Д.Наранбаярыг Аймгийн тамгийн газрын даргаар томилж хууль зөрчиж шийдвэр гаргажээ. Уг үйлдэл нь Эрүүгийн хуулийн 22.1 дүгээр зүйлийн 22.1-1 дэх хэсэгт зааснаар Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, Д.Наранбаярт давуу байдал бий болгосон байх тул тус үйлдлийг зөрчилд тооцож, Авлигатай тэмцэх газар шалгуулах шаардлага бий болсон гэж тус аймгийн ИТХ-ын төлөөлөгчид үзжээ.

Иймээс аймгийн Засаг дарга Д.Пүрэв-Очирыг огцруулах саналыг тус аймгийн 16 төлөөлөгч гарын үсэг зуран ИТХ-ын даргад өргөн барьжээ.