Ерөнхий сайд Л.Оюун-Эрдэнэ: Тайван жагсаал хийхэд зохион байгуулагчид анхаарах нь зүйтэй
Монгол Улсын Ерөнхий сайд Л.Оюун-Эрдэнэ СХД-ийн 12-р хорооны вакцины цэгт өнөөдөр ажиллалаа. Энэ үеэр жагсаал цуглаантай холбоотой тайлбар мэдээллийг өгсөн юм. Тэрбээр "Сөрөг хүчин төр засагтаа шүүмжлэлтэй хандах ёстой. Монгол Улс бол ардчилсан улс. Олонх нь засгийн эрхээ барьж, цөөнхөд хүндэтгэлтэй хандах зарчимтай. Монгол Улсын Үндсэн хуулийн дагуу иргэд жагсаал, цуглаан хийх эрхтэй. Тайвнаар үг хэлэх, хэвлэн нийтлэх, сонгох, сонгогдох зэрэг олон улс төрийн эрхтэй. Эдгээрийн нэг нь жагсаал, цуглаан хийх эрх. Миний хувьд ч жагсаал, цуглаанд өөрөө оролцож явсан хүн. Тиймээс иргэдийн жагсаж, цуглах эрхэд туйлын хүндэтгэлтэй хандана. Жагсаал, цуглаанаар тавьж буй асуудлыг ажил хэрэгтээ шүүмжлэл гэхээсээ зөвлөгөө гэж хүлээж авч ажилдаа тусгах ёстой. Үүнийг Засгийн газар, холбогдох яам, тамгын газар анхааралтай ажиглах ёстой. Нэг зүйлийг л анхаарах хэрэгтэй.
Хүмүүс ажиглахгүй байгаа болохоос сонгууль явж байгаа шүү дээ. Сонгуультай холбоотой улс төржилт нэмэгддэг. Гэхдээ миний хувьд ганцхан л зүйлийг уриалж байна. Ковид, вакцинжуулалтыг бүү улс төржүүлээч ээ. Дөнгөж сэрж байгаа эдийн засагт шууд хор хөнөөл болох зүйлийг битгий улс төржүүлээч гэж байгаа юм. Бусад нь тийм ч сонин зүйл биш. Бодлогогүй улс төрөөс болж вакцин тасалдах зэрэг асуудал өмнө үүсч байсан шүү дээ. Энэ асуудалд л нэгдмэл байр суурьтай байх хэрэгтэй байгаа юм. Энэ бол давагдашгүй хүчин зүйл. Жагсаал хийж буй иргэдийн жагсах, цуглах эрхийг хүндэтгэж байгаа. Харин жагсаал зохион байгуулж буй хүмүүсийн хувьд халдвар хамгааллын дэглэмийг баримталж, тайван жагсаал байх тал дээр хариуцлагатай хандах нь зүйтэй" гэлээ.
