“Сахал“ Д.Эрдэнэбилэг зээлээ БҮРЭН ТӨЛЖ, хааснаар Хөгжлийн банк ДАМПУУРАХ ЭРСДЭЛЭЭС ГАРЛАА

Засгийн газрын ээлжит хуралдаан боллоо. Хуралдаанаас гарсан шийдвэрийн талаар Хөгжлийн банкны гүйцэтгэх захирал Н.Мандуул “Зээлийн эргэлт нийтдээ 503 тэрбум төгрөгт хүрсэн. Оны эхэнд нийт 66 зээлдэгч зээлээ төлөөгүй байсан бол одоо нийт долоон зээлдэгч зээлээ бүрэн төлж хаасан. Тухайлбал, “Кью Эс Си” зэрэг томоохон зээлдэг зээлээ бүрэн төлсөн. Үүнээс гадна банкны зүгээс хоёр том ажил хийсэн. Нэгдүгээрт, олон улсад зээлжих зэрэглэлээ тогтоолгосон. Өөрөөр хэлбэл, банкны зээлжих зэрэглэлээ тогтвортой түвшин авч үлдсэн. Хоёрдугаарт, санхүүгийн аудит хийж дуусгасан. Оны өмнө 4.4 их наяд төгрөгийн эрсдэлийн сан байгуулах шаардлага тулгарч байсан. Ажлын хэсгийн шалгалтаас үр дүн гарч өнөөдрийн байдлаар 906 тэрбум төгрөгийн эрсдэлийн сан байгууллаа. Ингэснээр Хөгжлийн банк дампуурах эрсдлээс гарч чадлаа" гэлээ.

Ташрамд дурдахад, Худалдаа хөгжлийн банкны ТУЗ-ийн дарга Д.Эрдэнэбилэгийг АТГ-аас шалгаж, цагдан хорьсон юм. “Кью Эс Си” компани нь Д.Эрдэнэбилэгийн мэдлийнх бөгөөд Дарханы төмөрлөгийн үйлдвэрийг концессын гэрээгээр авсан юм. Гэвч концессын гэрээгээр хүлээсэн үүргээ биелүүлээгүй учир Засгийн газрын шийдвэрээр төрд буцаан авсан. Улмаар Д.Эрдэнэбилэг зээлээ эргэн төлөх хүсэлтийг ТӨБЗГ-т хүргүүлснээр ийнхүү зээлээ төлж, хаажээ.