ҮХНӨ-ийг энэ намар ДУУСГАХ УУ
Намрын улс төр өнөөдөр бүрэн утгаараа “сэрж”, монголчууд хэсэгтээ л улстөржих нь ойлгомжтой. Сайдуудын томилгоо, улсын төсвөөс эхлээд олон чухал асуудлууд, хуулийн төслүүд шийдлээ хүлээж байна.
Тэгвэл эдгээрээс хамгийн сонирхол татсан сэдэв бол ҮХНӨ-ийн асуудал юм. Өөрөөр хэлбэл, ҮХНӨ-ийг хийж, тогтолцооны өөрчлөлтийг ярихгүйгээр орхих нь МАН-д хасах оноо болох учиртай. Хэрэв ҮХНӨ-ийг энэ чигтээ бүүвэйлээд үлдээвэл дараагийн сонгуулиар МАН-ынхан “нүд рүүгээ хуруугаа хийх” эхлэл нь болох ойлгомжтой.
Тиймээс эрх баригчид ҮХНӨ-ийг төсвийн хэлэлцүүлэг дуусахтай зэрэгцүүлж эхлүүлэхээр ярилцаж буй талаар эх сурвалж мэдээлж байна. Гэхдээ зарим гишүүд нь намар, өвлийн хахир хэцүү цагт ҮХНӨ-ийг ярьж амжихгүй. Өвлийн бэлтгэл, өвөлжилтийн хүндрэлээс эхлээд олон асуудал байгаа тул ҮХНӨ-ийг ирэх хавар руу “шидье” гэдэг байр суурийг илэрхийлсээр байгаа аж.
Харин эрх баригчид явж өгдөггүй улс төрийн намын хуулийг ҮХНӨ-тэй хамт уяж байж батлуулахыг зорьж буй гэх мэдээлэл ч байна.
Ямартаа ч энэ намрын хувьд ҮХНӨ-ийг МАН-ынхан хийх үү гэдэг чухал асуултад хариулт өгнө.
Мөн дөрвөн сайдыг томилох асуудал, АН-ыг засагтаа оруулах эсэх болон Д.Амарбаясгаланг генсекээр давхар ажиллахыг шийдэх намын хурлын тов ч гэсэн ҮХНӨ-өөс шалтгаална. Товчоор хэлбэл, ҮХНӨ энэ намрын хамгийн топ сэдэв байх болно.
