ЦЕГ: Иргэн И.Томоко ЗГ-ын ордныг бүтэн харуулж, хэд хэдэн удаа урдаас нь бичлэг хийсэн тул зогсоосон
Зөгийчин И.Томоко өчигдөр /2023.02.16/ Төрийн ордны урд бичлэг хийж байхад нь цагдаагийн албан хаагчид Төрийн ордны хажууд бичлэг хийхийг нь эсэргүүцсэн. Энэ талаарх видео бичлэгээ зөгийчин И.Томоко өөрийн цахим хуудаснаа нийтэлсэн юм.
Тэгвэл уг асуудлаар ЦЕГ-аас тодруулга мэдээлэл өглөө. Тодруулбал, "Аливаа улс оронд төрийн эрх барих байгууллагыг тал бүрээс нь дүрс, бичлэг хийхийг хориглодог бөгөөд энэ нь гадны улс оронд мэдээ, мэдээлэл дамжуулахаас эхлээд ямар ч санаа зорилготой байхыг үгүйсгэдэггүй юм байна. Томоко гэх Япон Улсын иргэн нь чипс сурталчилж байна гэх нэрийдлээр Засгийн газрын ордныг бүтэн харуулж, хэд хэдэн удаа урдаас нь эхлэн бичлэг хийснийг Төрийн тусгай хамгаалалтын газраас цагдаагийн байгууллагад хүсэлт тавьж бичлэгийг зогсоолгосон байна" гэлээ.
