АУДИТ: ЭЗХЯ Дэлхийн банкнаас 46 сая төгрөгийн санхүүжилт авч Тэрэлжид сургалт зохион байгуулсан гэх боловч тайлангүй байна

Эдийн засаг, хөгжлийн яамны 2022 оны санхүүгийн тайлан, төсвийн гүйцэтгэлд хийсэн аудитын тайлангаар хэд хэдэн зөрчил илэрчээ. Үүнд:

-44 сая 200 мянган төгрөгийг авто машины обуд, дугуй худалдан авах, засвар үйлчилгээнд болон бусад хөрөнгө бэлтгэхэд зарцуулсан-

Тайлант онд авто машины обуд, дугуй худалдан авах, засвар үйлчилгээнд болон бусад хөрөнгө бэлтгэхэд нийт 44 сая 200 мянган төгрөг үргүй зардал гаргасан байна. Түүнчлэн Магнай трейд ХХК-аас 2022 оны 12 дугаар сарын 15-ны өдөр 11 сая төгрөгийн түлш шатахуун бэлтгэж, 7.3 сая төгрөгийн шатахууны нөөц үүсгэсэн байна.

-Томилолтын баримтын бүрдэл дутуу 39 сая 411 мянган төгрөгийн ажлыг бүртгэсэн-

Тайлант онд анхан шатны баримтын бүрдэл дутуу нийт 41 сая 333 мянган төгрөгийн ажил гүйлгээг бүртгэсэн байна. Тухайлбал: Томилолтын баримтын бүрдэл дутуу 39 сая 411 мянган төгрөг, ибаримтгүй 1.9 сая төгрөг, Стийл Порект ХХК-тай байгуулсан гэрээнд ажил гүйцэтгэх хугацаа тусгаагүй гэрээ дүгнэсэн акт байхгүй 19 сая 705 мянган төгрөг байна.

-Дэлхийн банкнаас 46 сая гаруй төгрөгийн санхүүжилт авч, Тэрэлжид сургалт зохион байгуулсан боловч сургалт хэлэлцүүлгийн тайлан байхгүй-

Дэлхийн банкнаас 15,000.0 доллар буюу 46 сая 875 мянган төгрөгийн санхүүжилт авч "Хөгжлийн бодлого боловсруулалт, түүний тогтвортой хэрэгжилтийг хангах нь" сэдвийн хүрээнд байгууллагын бүх ажилчдыг хамруулан 6 дугаар сарын 10,11-ний өдрүүдэд Тэрэлжид сургалт зохион байгуулсан боловч сургалт хэлэлцүүлгийн талаарх тайлан байхгүй, анхан шатны баримтыг нөхөн бүрдүүлсэн байна.

-Автомашинуудын бензин зарцуулалт, ашиглалтад тавих хяналт сул-

Шатахуун, тос тослох материалын зарлагын гүйлгээний анхан шатны баримт бүрдэл хангалтгүй байна. Үүнд:

-Жолоочийн тооцооны хуудаст машины дугаар, явсан албан тушаалтны нэр бичээгүй, гарын үсэг зураагүй; Автомашинуудын бензин зарцуулалт, ашиглалтад тавих хяналт сул. Сар бүрийн жолоочийн тооцооны хуудасны ирсэн явсан цагийн бүртгэлгүй, шатахууны зарцуулалтад нягтлан бодогчийн зүгээс хяналт хангалтгүй, зарим автомашины жолоочийн тооцооны хуудас хөтлөгдөөгүй байна.