Ц.Сандаг-Очир: Туулын хурдны замын ажлыг эхлүүлсэн компанид торгууль ногдуулна

Туулын хурдны замын төслийг хууль нийцүүлтэл БОУАӨЯ-наас түр зогсоож шийдвэрлэсэн. Тодруулбал БОУАӨ-ийн сайд Ц.Сандаг-Очир байгаль орчны хууль тогтоомжийн хэрэгжилтийг хангаж, төслийг холбогдох шаардлагад нийцүүлэн хэрэгжүүлэхтэй холбогдуулан дараах арга хэмжээг авч буйгаа мэдэгдсэн. Үүнд:

-Төсөл хэрэгжих нутаг дэвсгэрийн байгаль орчныг хамгаалах, зүй зохистой ашиглах, нөхөн сэргээх, стратегийн үнэлгээний зөвлөмжийн хэрэгжилтийг хангах, нөлөөллийн нарийвчилсан үнэлгээгээр тогтоосон сөрөг нөлөөллийг бууруулах, арилгах, урьдчилан сэргийлэх, төсөл хэрэгжих орчинд бий болж болзошгүй сөрөг үр дагаврыг хянах, илрүүлэх зорилгоор тухайн жилийн байгаль орчны менежментийн төлөвлөгөөг боловсруулж, батлуултал төслийн үйл ажиллагааг түр зогсоох;

-Төсөл хэрэгжүүлэгч нь батлагдсан байгаль орчны нөлөөллийн нарийвчилсан үнэлгээнд тавигдсан шаардлагыг биелүүлээгүй, тухайн жилийн байгаль орчны менежментийн төлөвлөгөөг батлуулалгүйгээр үйл ажиллагаа эхлүүлсэн зэрэг асуудал илэрсэн тул Төрийн хяналт шалгалтын тухай хуулийн дагуу холбогдох арга хэмжээ авахыг Байгаль орчны улсын хяналтын газарт үүрэг болгосон.

Тэгвэл БОУАӨ-ийн сайд Ц.Сандаг-Очир хэвлэлд өгсөн ярилцлагадаа "Туулын хурдны замын ажлыг эхлүүлсэн компанид торгууль ногдуулна. Эрх зүйн баримт бичгүүд бүрдээгүй байхад ажил эхлүүлсэн. Манай яам хуулиа л дагана. Ингэхгүй юм бол манай яам байгаад яах юм бэ. Улстөржиж зогсоосон зүйл байхгүй" гэж байр сууриа илэрхийлсэн байна.