КОНСУЛЫН АЛБА: Мьянмар, Вьетнам зэрэг улсуудад зорчиж буй иргэд гэмт хэргийн хохирогч болох тохиолдол гарч байна

Зүүн Өмнөд Азийн зарим улсад ковид19-ийн нөхцөл байдал сайжирч, аялал жуулчлалын болон бусад зорилгоор зорчих иргэдийн тоо нэмэгдэж байгаатай холбогдуулан Монгол Улсын Консулын албанаас дараах сэрэмжлүүлгийг хүргэлээ. Тодруулбал, Зүүн өмнөд Азийн орнууд, тухайлбал, Мьянмар, Вьетнам, Камбож, Шри-Ланка зэрэг улсад зорчиж буй иргэд гэмт хэргийн хохирогч болох, хэрэг зөрчилд холбогдох, богино хугацаанд их хэмжээний мөнгө, өндөр цалин амласан зар сурталчилгаа, үл таних этгээдийн ятгалгад автаж бичиг баримтаа хураалгах, хөдөлмөрийн мөлжлөгт өртөх, эрх чөлөөгөө хязгаарлуулж эд хөрөнгө, амь насаараа хохирох явдал гарч байна. Ялангуяа гадаадын иргэд олноор өртөж байгаа цахим дуудлагын төвд ажиллах, хулгайлах, мөнгө угаах болон залилангийн гэмт хэрэгт холбогдох, их хэмжээний өр төлбөрт орж албадан хөдөлмөр эрхлэх тохиолдол цөөнгүй байгаа аж.

Иймд гадаад улсад зорчих гэж буй иргэд улс төр, эдийн засгийн байдал, аюулгүй байдал хууль тогтоомж зэргийг судалж, цахим сүлжээнд тавигдаж буй өндөр цалин амласан ажлын саналыг хүлээж авахын өмнө нягтлах, аюулгүй байдлаа хангаж зорчихыг албаныхан анхаарууллаа.