Ч.Отгонжаргал: 100-150 сая төгрөгтэй хүн машин унаж, бусад нь АЛХ гэсэн шийдвэр гаргаж байна

Улаанбаатар хотын түгжрэл, агаарын бохирдол, зам тээврийн ослын тоог бууруулах зорилгоор Улаанбаатар хотын нийтийн тээврийн улсын бүртгэлийн дугаарын дээд хязгаарыг тогтоох шийдвэр энэ сарын 8-наас хэрэгжиж эхэлсэн билээ. Энэхүү шийдвэрийн хүрээнд импортоор орж ирж буй автомашинд Улаанбаатар хотын серитэй улсын дугаар олгоход хязгаарлалт хийсэн юм. Хязгаарлалтыг хийхдээ УИХ-аас яаралтай горимоор баталсан “Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн 9.1 дэх заалтыг” үндэслэсэн.

Тэгвэл иргэдийн төлөөллөөс энэ заалт нь Үндсэн хууль зөрчсөн гэж үзэж, Үндсэн хуулийн цэцэд хандаж байгаа аж.

Иргэн Ч.Отгонжаргал "100-150 сая төгрөгтэй хүн машин унаж, бусад нь АЛХ гэсэн шийдвэр гаргаж байна. Дугаар олголтыг хязгаарласнаас болж, би машинаа солиход хүндрэлтэй боллоо. Машинаа эвдрээд, салж унатал нь барих ёстой юм уу, яахаа мэдэхгүй байна" хэмээлээ.