З.Энхболд: Энэ нэг МАНгартаа инженерүүд нь хэлээч
Хотын дарга Х.Нямбаатар өчигдөр NTV телевизийн Лхагвын тойм ярилцлагын нэвтрүүлэгт оролцсон. Энэ үеэрээ "ТЭЦ-3, ТЭЦ-4-н бүх зуухнууд нь 40 жил, 60 жил болчихсон. Хэзээ дэлбэрэх нь тодорхойгүй "МИНА"-н дээр 2 сая хүнтэй хот явж байгаа шүү" хэмээн мэдэгдсэн: Тодруулбал, "ТЭЦ-5-ын яриа бүр 1986-1987 оноос эхэлсэн юм байна лээ. Энэ чинь мөнгө нь шийдэгдчихсэн шүү дээ. Японоос эх үүсвэр нь шийдэгдсэн байж байгаад манай нөгөө талцал хуваагдал, 2000-аад оны үеийн, 2010-аад оны үеийн Мояа, Хуяа үзлийн өрсөлдөөнүүдээс болоод хойшилсон. Тэгээд тарифыг нь борцолж өгөөд, бүх оролцогчдыг нь хөөж гаргаад, эцсийн дүндээ лаа барих түвшинд очсон. Харин Бөөрөлжүүт, Багануурын цахилгаан станцууд ашиглалтад ороогүй бол энэ өвөл бүр илүү тасрах байсан. Сая Бөөрөлжүүтэд жаахан алдаа гарсан.
ТЭЦ-4-ийн зуухнууд гэмтсэн. Яг үнэндээ ТЭЦ-3, ТЭЦ-4 мина дээр суучихсан явж байгаа шүү дээ. Бүх зуухнууд нь 40 жил, 60 жил болчихсон. Хэзээ дэлбэрэх нь тодорхойгүй мина дээр 2 сая хүнтэй хот явж байгаа шүү. Яаралтай тарифтаа өөрчлөлт оруулж, эх үүсвэрүүдээ нэмэгдүүлж, шинэчилмээр байна. Миний санаагаар болдог бол ТЭЦ-3-аа хааж унтрааж, хотын төвд станц байлгахгүй иргэний суурьшлын бүс болгох ёстой гэж боддог юм. Ер нь бид эрчим хүчнийхээ үндсэн философид өөрчлөлт оруулах хэрэгтэй. Энэ Хрущёвко гэдэг загвар. Хрущёвын үеийн нийтээр нь хуарагнуулж, орон сууцжуулаад хажууд нь нэг том станц бариад бүгдийг нь халаадаг тогтолцоо. Гадны улс орнууд бие даасан эх үүсвэрүүдээр хотхон, хотхонд нь шийдэж явдаг. Манайх шиг хотын төвдөө нүүрсний станцтай, тэр нь тойроод 16 давхар орон сууц баригдсан хот байхгүй.
Дулааны маш олон шийдэл бий болчихсон. Бид азаар Багануурт станц барих ордтой. Тэндээсээ 500-гийн хос шугамаар эрчим хүчээ дамжуулаад, дулааныхаа асуудлыг байгаль орчинд ээлтэй хитпамп байх уу, LMG байх уу, газрын гүний дулаанаар шийдэх үү. Дэлхий нийтэд маш олон технологиуд нь хэрэгжиж байна. Би өөрөө ч их сониуч хүн юм. Энэ болгоны ихэнхтэй нь танилцаад явж байна" гэсэн юм. Уг ярилцлагыг бүрэн эхээр нь энд дарж унших боломжтой.
Тэгвэл түүний уг мэдээллийг АН-ын дарга асан З.Энхболд "Энэ нэг МАНгартаа инженерүүд нь хэлээч. Зуухны эд ангиуд өөр өөрийн эдэлгээний хугацаатай, хугацаа нь болохоор тухай бүрд нь солиод явдаг учраас зуухны нийт нас гэж байхгүй. Галд тэсвэртэй тоосгоны нас, бесшовный трубаны нас гээд бүгд өөр, бас ашиглалтаас хамаарна" гэжээ.
